തിരുവനന്തപുരം: ‘ടിക്കറ്റെടുത്ത കാശിനുള്ളത് പോലും ആയില്ല’ കാര്യവട്ടം ഏകദിനത്തില്‍ വെടിക്കെട്ട് പ്രതീക്ഷിച്ചവര്‍ക്ക് മുന്നില്‍ അനായാസ വിജയവുമായി ഇന്ത്യ നിന്നതോടെ നിരാശരായത് ആരാധകരാണ്. ഇന്ത്യ വിജയിച്ച് പരമ്പരയും സ്വന്തമാക്കിയെങ്കിലും റണ്‍മഴ കാണാനാകാത്ത വിഷമം ടിക്കറ്റെടുത്ത് മത്സരം കാണാനെത്തിയവര്‍ക്ക് അങ്ങോട്ട് മാറിയില്ലെന്ന് സോഷ്യല്‍മീഡിയ പറയുന്നു. 104 റണ്‍സിന് വിന്‍ഡീസിനെ എറിഞ്ഞിട്ട ഇന്ത്യ, 14.5 ഓവറില്‍ ശിഖര്‍ധവാനെ നഷ്ടപ്പെടുത്തി ഇന്ത്യ ജയിച്ചിട്ടുമുണ്ട്.
ഇന്ത്യക്ക് ടോസ് കിട്ടുമെന്നും ബാറ്റിങ് തെരഞ്ഞെടുക്കുമെന്നും കരുതിയെങ്കിലും അതും നടന്നില്ല, അഞ്ചാം ഏകദിനത്തില്‍ ടോസ് വെസ്റ്റ് ഇന്‍ഡീസിന് ലഭിക്കുകയായിരുന്നു. ഇന്ത്യയില്‍ നടക്കുന്നൊരു പരമ്പരയിലെ അഞ്ച് ടോസുകളും ലഭിക്കുന്ന ആദ്യ നായകനെന്ന നേട്ടം കോഹ്ലി സ്വന്തമാക്കുമെന്ന് കരുതിയതും വെറുതെയായി.
എങ്കിലും ബാറ്റിങ് ട്രാക്കായതിനാല്‍ വിന്‍ഡീസ് ബാറ്റുചെയ്താലും റണ്‍സൊഴുകുമെന്ന് കരുതി. അവിടെയും നിരാശ. 31.5 ഓവറില്‍ 104 റണ്‍സിന് കരീബിയന്‍ പട പുറത്ത്. മറുപടി ബാറ്റിങില്‍ 14.5 ഓവറില്‍ ഇന്ത്യ ലക്ഷ്യത്തിലെത്തി. ആകെ കളിനടന്നത് 46 ഓവറിലും. 50 ഓവര്‍ പോലും തികച്ചില്ല! ഇതോടെ ഫ്‌ളഡ് ലൈറ്റും മഞ്ഞും ഒക്കെ മുന്നില്‍ കണ്ട് മങ്കി ക്യാപ്പ് ഒക്കെ വാങ്ങിച്ച് വന്നവര്‍ക്ക് നിരാശയോട് നിരാശയെന്ന് ട്രോളന്മാര്‍ പറയുന്നു.
