ജയ്പൂര്‍: ജയിക്കേണ്ട മത്സരം എതിരാളിക്ക് വിട്ടുകൊടുത്ത് തോല്‍വി വാങ്ങി തൃപ്തിയടഞ്ഞിരിക്കുകയാണ് രാജസ്ഥാന് റോയല്‍സ്. ഇന്ത്യന്‍ പ്രീമിയര്‍ ലീഗില്‍ കിങ്സ് ഇലവന്‍ പഞ്ചാബിനോട് 14 റണ്‍സിനായിരുന്നു ആതിഥേയരായ രാജസ്ഥാന്റെ തോല്‍വി. ക്രിസ് ഗെയ്ലിന്റെ (79)യും സര്‍ഫറാസ് ഖാന്റെയും (46) ഇന്നിങ്സിന്റെ കരുത്തില്‍ 184 റണ്‍സ് നേടിയ പഞ്ചാബിനെതിരെ മറുപടി ബാറ്റിങിനിറങ്ങിയ രാജസ്ഥാന് വിക്കറ്റുകള്‍ എറിഞ്ഞുകളഞ്ഞ് തോല്‍വി വാങ്ങിച്ചെടുക്കുകയായിരുന്നു. 185 റണ്‍സ് വിജയലക്ഷ്യവുമായി ബാറ്റിങ്ങിനിറങ്ങിയ രാജസ്ഥാന് നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 179 റണ്‍സെടുക്കാന്‍ മാത്രമാണ് സാധിച്ചത്. 69 റണ്‍സ് നേടിയ ജോസ് ബട്ലറാണ് രാജസ്ഥാന്റെ ടോപ് സ്‌കോറര്‍. സാം കുറന്‍, മുജീബ് റഹ്മാന്‍ എന്നിവര്‍ രണ്ട് വീതം വിക്കറ്റ് വീഴ്ത്തി.
ഒരു ഘട്ടത്തില്‍ ഒന്നിന് 78ഉം പിന്നീട് രണ്ടിന് 108 എന്ന ആധികാര നിലയിലുമായിരുന്നു രാജസ്ഥാന്. പിന്നീട് സ്‌കോര്‍ 16.4 ഓവറില്‍ രണ്ടിന് 148 റണ്‍സിലേക്ക് ഉയര്‍ന്നു. എന്നാല്‍ കുറന്‍ എറിഞ്ഞ 17ാം ഓവറില്‍ സ്റ്റീവ് സ്മിത്ത് (20), സഞ്ജു സാംസണ്‍ (30) എന്നിവര്‍ മടങ്ങിയതോടെ രാജസ്ഥാന്റെ തകര്‍ച്ചയ്ക്ക് തുടക്കമായി. ഇതിനിടെ ജോസ് ബട്ലറെ മങ്കാഡിങ്ങിലൂടെ അശ്വിന്‍ പുറത്താക്കി. പിന്നെ രാജസ്ഥാന് കരകയറിയില്ല.
18-ാം ഓവര്‍ എറിയാനെത്തിയ മുജീബ് റഹ്മാനും ഓവറില്‍ രണ്ട് വിക്കറ്റ് വീഴ്ത്തി. ബെന്‍ സ്റ്റോക്സ് (6), രാഹുല്‍ ത്രിപാഠി (1) എന്നിവരാണ് ആ ഓവറില്‍ മടങ്ങിയത്. പിന്നീടെത്തിയവര്‍ വന്നത് പോലെ മടങ്ങി. കൃഷ്ണപ്പ ഗൗതം (3), ജോഫ്ര ആര്‍ച്ചര്‍ (2), ജയദേവ് ഉനദ്ഘഡ് (1) എന്നിവര്‍ക്ക് ഒന്നും ചെയ്യാന്‍ സാധിച്ചില്ല. ശ്രേയാസ് ഗോപാല്‍ (1), ധവാല്‍ കുല്‍ക്കര്‍ണി (5) എന്നിവര്‍ പുറത്താവാതെ നിന്നു.
ടോസ് നഷ്ടപ്പെട്ട് പതിയെ ബാറ്റിങ് തുടങ്ങിയ പഞ്ചാബ് ആദ്യ ആറോവറില്‍ 32 റണ്‍ മാത്രമാണ് നേടിയത്. രാജസ്ഥാന് നായകന്‍ അജിങ്ക്യ രഹാനെയുടെ തീരുമാനം ശരിയെന്ന് തോന്നിപ്പിച്ച നിമിഷങ്ങള്‍ പിന്നീട് ഒറ്റയടിക്ക് ട്രാജഡിക്ക് വഴിമാറുകയായിരുന്നു. എന്നാല്‍ ഗെയ്ല്‍ തനി സ്വരൂപം പുറത്തെടുത്തതോടെ, പഞ്ചാബ് മികച്ച സ്‌കോറിലേക്ക് നീങ്ങുകയായിരുന്നു. എട്ട് ഫോറും നാല് സിക്സും അടങ്ങുന്നതായിരുന്നു ഗെയ്ലിന്റെ ഇന്നിങ്സ്. എന്നാല്‍ ഗെയ്ലിനെ ബെന്‍ സ്റ്റോക്സ് മടക്കിയതോടെ പഞ്ചാബിന്റെ റണ്‍റേറ്റ് കുറഞ്ഞു. നികോളസ് പൂരാന് (14 പന്തില്‍ 12), വേണ്ട വിധത്തില്‍ സ്‌കോര്‍ ഉയത്താന്‍ കഴിഞ്ഞതുമില്ല. മന്‍ദീപ് സിങ് (5), സര്‍ഫറാസ് എന്നിവര്‍ പുറത്താവാതെ നിന്നു.
Discussion about this post