ചെന്നൈ: നിലവിലെ ചാമ്പ്യന്മാരായ കേരളത്തിന് സന്തോഷ് ട്രോഫിയില് നിന്നും നാണംകെട്ട് മടക്കം. കഴിഞ്ഞ തവണ ബംഗാളില് നിന്നും കിരീടവുമായി മടങ്ങിയെത്തിയ കേരളസംഘം ഇത്തവണ ഇത്തവണ ഫൈനല് റൗണ്ട് പോലും കാണാതെയാണ് മടങ്ങുന്നത്. ഇന്ന് നടന്ന യോഗ്യതാ റൗണ്ടിലെ അവസാന മത്സരത്തില് സര്വീസസിനോട് തോറ്റതോടെയാണ് കേരളം പുറത്തായത്. എതിരില്ലാത്ത ഒരു ഗോളിന്റെ പരാജയമാണ് സര്വീസസില് നിന്നും കേരളം വഴങ്ങിയത്.
ആദ്യ രണ്ടു മത്സരങ്ങളില് സമനില വഴങ്ങിയപ്പോള് തന്നെ കേരളത്തിന്റെ പ്രതീക്ഷകള് മങ്ങിയിരുന്നു. എന്നിട്ടും ഗ്രൂപ്പിലെ മറ്റു ഫലങ്ങള് കേരളത്തെ തുണച്ചു. ഇന്ന് രാവിലെ കേരളത്തിന്റെ ഗ്രൂപ്പില് നടന്ന മത്സരത്തില് പോണ്ടിച്ചേരി തെലുങ്കാനയെ സമനിലയില് പിടിച്ചതോടെ കേരളത്തിന്റെ ഫൈനല് റൗണ്ട് പ്രതീക്ഷ സജീവമായിരുന്നു. ഇന്ന് സര്വീസസിനെ നേരിടുമ്പോള് 2 ഗോള് വിജയം മാത്രം മതിയായിരുന്നു കേരളത്തിന് ഫൈനല് റൗണ്ടില് എത്താന്. എന്നാല് കളത്തില് എല്ലാം നഷ്ടപ്പെട്ടവരെ പോലെയായിരുന്നു കേരളാ താരങ്ങള്.
രണ്ടാം പകുതിയില് ആയിരുന്നു സര്വീസസിന്റെ വിജയ ഗോള് പിറന്നത്. ഗോളിന് പിറകെ കേരളത്തിന്റെ അലക്സ് സജി ചുവപ്പ് കണ്ടത് കളിയില് കേരളത്തിന് തിരിച്ചുവരാനുള്ള സാധ്യതയും ഇല്ലാതെയാക്കി.
ആറു പോയന്റോടെ സര്വീസസ് ആണ് കേരളമുള്പ്പെട്ട ഗ്രൂപ്പില് നിന്ന് ഫൈനല് റൗണ്ടില് കടന്നത്. 5 പോയന്റുമായി തെലുങ്കാന രണ്ടാമതും എത്തി. പോണ്ടിച്ചേരിക്കും കേരളത്തിനും 2 പോയന്റു മാത്രമെ ഉള്ളൂ.
Discussion about this post