കേപ്ടൗണ്‍: ദക്ഷിണാഫ്രിക്കയുടെ ബെസ്റ്റ് ഫിനിഷര്‍ എന്ന് വിശേഷിപ്പിക്കപ്പെടുന്ന ഓള്‍റൗണ്ടര്‍ ആല്‍ബി മോര്‍ക്കല്‍ അന്താരാഷ്ട്ര ക്രിക്കറ്റില്‍ നിന്ന് വിരമിച്ചു. 58 ഏകദിനങ്ങളും 50 ട്വന്റി-ട്വന്റിയിലും ദക്ഷിണാഫ്രിക്കന്‍ ജഴ്സിയണിഞ്ഞ ആല്‍ബി മോര്‍ക്കല്‍ ദക്ഷിണാഫ്രിക്കയ്ക്കായി ഒരു ടെസ്റ്റില്‍ മാത്രമാണ് കളിച്ചിട്ടുള്ളത്. ലിമിറ്റഡ് ഓവര്‍ ക്രിക്കറ്റില്‍ ദക്ഷിണാഫ്രിക്കയുടെ ബെസ്റ്റ് ഫിനിഷര്‍ എന്നായിരുന്നു ആല്‍ബി അറിയപ്പെട്ടിരുന്നത്. 2015 ന് ശേഷം ദേശീയടീമില്‍ സ്ഥിരസാന്നിധ്യമല്ലായിരുന്നു.
കളിച്ച ഏകടെസ്റ്റില്‍ 58 റണ്‍സാണ് സമ്പാദ്യം. ഒരു വിക്കറ്റും നേടിയിട്ടുണ്ട്. 58 ഏകദിനങ്ങളില്‍ 782 റണ്‍സും 50 ട്വന്റി-ട്വന്റിയില്‍ 572 റണ്‍സും നേടിയിട്ടുണ്ട്. ഏകദിനത്തില്‍ 50 വിക്കറ്റും ട്വന്റി-ട്വന്റിയില്‍ 26 വിക്കറ്റും നേടിയിട്ടുണ്ട്.
ഐപിഎല്ലില്‍ ചെന്നൈ സൂപ്പര്‍ കിംഗ്സിന്റെ താരമായിരുന്ന മോര്‍ക്കല്‍ 91 മത്സരങ്ങളില്‍ നിന്നായി 974 റണ്‍സും 85 വിക്കറ്റും നേടിയിട്ടുണ്ട്.