ഫ്ളോറിഡ: അർജന്റീനൻ ഫുട്‌ബോൾ ഇതിഹാസം ലയണൽ മെസ്സി ഇനി ഇന്റർ മിയാമി താരം. യുഎസ്സിലെ മേജർ ലീഗ് സോക്കർ ക്ലബ്ബായ ഇന്റർ മിയാമി പുതിയ താരമായി മെസിയെ ആരാധകർക്ക് മുന്നിൽ അവതരിപ്പിച്ചു. 492 കോടി രൂപ വാർഷിക പ്രതിഫലത്തിലാണ് മെസി പിഎസ്ജിയിൽ നിന്നും മിയാമിയിലെത്തിയത്. 2025 വരെയാണ് മെസ്സിയുമായുള്ള കരാർ.
മെസ്സിയെ അവതരിപ്പിച്ച ചടങ്ങിൽ ആരാധകരുടെ ആവേശം അണപൊട്ടിയൊഴുകുന്നത് ദൃശ്യമായിരുന്നു. ഇന്ത്യൻ സമയം പുലർച്ചെ 5.30 നായിരുന്നു ചടങ്ങുകൾ. ഇന്റർ മിയാമിയുടെ ഹോം ഗ്രൗണ്ടായ ഫ്ളോറിഡയിലെ ഡിആർവി പിഎൻകെ സ്റ്റേഡിയത്തിൽ ആയിരക്കണക്കിന് കാണികൾക്ക് മുന്നിലാണ് മെസിയെ അവതരിപ്പിച്ചത്. ഈ ദൃശ്യങ്ങൾ സോഷ്യൽമീഡിയയിൽ വൈറലാവുകയാണ്.
ഇംഗ്ലണ്ടിന്റെ സൂപ്പർ താരം ഡേവിഡ് ബെക്കാമിന്റെ ഉടമസ്ഥതയിലുള്ള ക്ലബ്ബാണ് ഇന്റർ മയാമി. മെസിക്ക് ക്ലബിൽ ഇഷ്ടനമ്പറായ പത്താം നമ്പർ ജഴ്സിയും മിയാമി അധികൃതർ സമ്മാനിച്ചു.
ഏഴുതവണ ബാലൻഡിഓർ കിരീടം നേടിയ മെസി ഇക്കഴിഞ്ഞ ജൂണിൽ പിഎസ്ജി വിടുകയായിരുന്നു. ക്ലബിലെ ആരാധകരമായും അധികൃതരുമായുള്ള സ്വരചേർച്ച കുറവാണ് മെസിയെ കൂടുമാറ്റത്തിന് പ്രേരിപ്പിച്ചത്. മെസി പിഎസ്ജിയിൽ താരം 30-ാം നമ്പർ ജഴ്സിയിലാണ് കളിച്ചത്.
Discussion about this post