ദുബായ്: ആദ്യവിജയം ലക്ഷ്യം വെച്ച് പഞ്ചാബും രണ്ടാം വിജയത്തിനായി ബാംഗ്ലൂരും ഏറ്റുമുട്ടിയപ്പോൾ കെഎൽ രാഹുലിന്റെയും ബൗളേഴ്‌സിന്റേയും മികവിൽ കിങ്‌സ് ഇലവൻ പഞ്ചാബിന് വൻ വിജയം. ബാംഗ്ലൂരിനെ 97 റൺസിനാണ് പഞ്ചാബ് പരാജയപ്പെടുത്തിയത്. ഒരുഘട്ടത്തിലും പഞ്ചാബിനെ വെല്ലുവിളിക്കാനാകാതെ ബാംഗ്ലൂരിന്റെ പുകൾപെറ്റ ബാറ്റിങ് നിര അമ്പേ പരാജയപ്പെട്ട മത്സരത്തിൽ 17ാം ഓവറിൽ 109 റൺസിന് ബാംഗ്ലൂർ ഓൾ ഔട്ട് ആവുകയായിരുന്നു. ടോസ് നഷ്ടപ്പെട്ട് ആദ്യം ബാറ്റ് ചെയ്ത പഞ്ചാബ് ഉയർത്തിയ 207 റൺസിന്റെ വിജയലക്ഷ്യത്തിലേക്കായി ബാറ്റേന്തിയ ബാംഗ്ലൂർ തുടക്കത്തിൽ തന്നെ മുൻനിര ബാറ്റ്‌സ്മാൻമാരെയെല്ലാം നഷ്ടപ്പെടുത്തി.
നാലു റണ്‍സിനിടെ തന്നെ മൂന്നു വിക്കറ്റുകള്‍ നഷ്ടമായ ബാംഗ്ലൂരിന്റെ തുടക്കം തകര്‍ച്ചയോടെയായിരുന്നു. മൂന്നാമത്തെ ഓവറിലേക്ക് കടന്നപ്പോൾ തന്നെ ഓപ്പണർമാരടക്കം മൂന്ന് താരങ്ങളെ നഷ്ടപ്പെട്ട ബാംഗ്ലൂർ തോൽവി ഏകദേശം ഉറപ്പിച്ചിരുന്നു. ഒരു റൺ എടുത്ത മലയാളി താരം ദേവ്ദത്ത് പടിക്കലും നായകൻ കോഹ്‌ലിയും റണ്ണൊന്നുമെടുക്കാതെ ജോഷ് ഫിലിപ്പിയുമാണ് വന്നയുടൻ തന്നെ തിരിച്ച് കൂടാരം കയറിയത്. പിന്നീട് ആരോണ്‍ ഫിഞ്ചും എ ബി ഡിവില്ലിയേഴ്‌സും ചേര്‍ന്ന് സ്‌കോര്‍ 53-ല്‍ എത്തിച്ചു. വൈകാതെ 20 റണ്‍സെടുത്ത ഫിഞ്ചിനെ രവി ബിഷ്‌ണോയ് മടക്കി. 28 റണ്‍സെടുത്ത ഡിവില്ലിയേഴ്‌സിനെ മുരുകന്‍ അശ്വിനും പുറത്താക്കി. 27 പന്തില്‍ ഒരു സിക്‌സും രണ്ടു ഫോറുമടക്കം 30 റണ്‍സെടുത്ത വാഷിങ്ടണ്‍ സുന്ദറാണ് ബാംഗ്ലൂര്‍ നിരയിലെ ടോപ് സ്‌കോറര്‍. ശിവം ദുബെ (12), ഉമേഷ് യാദവ് (0), സെയ്‌നി (6), ചാഹല്‍ (1) എന്നിവരാണ് പുറത്തായ മറ്റ് താരങ്ങള്‍. പഞ്ചാബിനായി രവി ബിഷ്‌ണോയ്, മുരുകന്‍ അശ്വിന്‍ എന്നിവര്‍ മൂന്നു വിക്കറ്റ് വീഴ്ത്തി.
നേരത്തെ, ക്യാപ്റ്റൻ വിരാട് കോഹ്‌ലിയുടെ പിഴവിൽ രണ്ട് തവണ ജീവൻ ലഭിച്ച പഞ്ചാബ് ക്യാപ്റ്റൻ കെഎൽ രാഹുൽ ഐപിഎൽ 13ാം സീസണിലെ ആദ്യ സെഞ്ച്വറി സ്വന്തമാക്കി. തകർത്തടിച്ച രാഹുലിന്റെ മികവിൽ പഞ്ചാബ് നിശ്ചിത 20 ഓവറിൽ മൂന്നു വിക്കറ്റ് മാത്രം നഷ്ടത്തിലാണ് 206 റൺസെടുത്തത്. വിരാട് കോഹ്‌ലി രണ്ടു തവണ ക്യാച്ചുകൾ കൈവിട്ട് സഹായം ചെയ്തപ്പോൾ രാഹുൽ 69 പന്തിൽനിന്ന് 132 റൺസുമായി പുറത്താകാതെ നിന്നു. 14 ഫോറും ഏഴു സിക്‌സറുകളും നിറഞ്ഞ ഇന്നിങ്‌സാണ് രാഹുലിന്റേത്. ഇതിനിടെ ഐപിഎലിൽ ഏറ്റവും വേഗത്തിൽ 2000 റൺസ് പൂർത്തിയാക്കുന്ന ഇന്ത്യൻ താരമായും രാഹുൽ മാറി. സാക്ഷാൽ സച്ചിൻ തെണ്ടുൽക്കറിന്റെ റൈക്കോർഡ് മറി കടന്നാണ് നേട്ടം. 2013 ൽ റോയൽ ചാലഞ്ചേഴ്‌സിനായി അരങ്ങേറിയ രാഹുൽ 60 ഇന്നിങ്‌സുകളിൽനിന്നാണ് 2000 റൺസ് പിന്നിട്ടത്. സച്ചിൻ 63 ഇന്നിങ്‌സുകളിൽനിന്നാണ് 2000 റൺസ് നേടിയത്.
മായങ്ക് അഗർവാൾ (20 പന്തിൽ 26), നിക്കോളാസ് പുരാൻ (18 പന്തിൽ 17), ഗ്ലെൻ മാക്‌സ്‌വെൽ (5), കരുൺ നായർ (എട്ടു പന്തിൽ പുറത്താകാതെ 15)എന്നിങ്ങനെയാണ് മറ്റു പഞ്ചാബ് താരങ്ങളുടെ പ്രകടനം. ഒന്നാം വിക്കറ്റിൽ രാഹുൽ – മായങ്ക് സഖ്യവും രണ്ടാം വിക്കറ്റിൽ രാഹുൽ-പുരാൻ സഖ്യവും 57 റൺസ് വീതമെടുത്തു. മാക്‌സ്‌വെൽ പെട്ടെന്നു മടങ്ങിയെങ്കിലും നാലാം വിക്കറ്റിൽ കരുൺ നായരെ കൂട്ടുപിടിച്ച് രാഹുൽ 78 റൺസ് കൂട്ടുകെട്ടും ഉയർത്തി. വെറും 28 പന്തിൽനിന്നാണ് രാഹുൽ-കരുൺ സഖ്യം 78 റൺസ് ചേർത്തത്. ഇതിൽ കരുണിന്റെ സംഭാവന 15 റൺസ് മാത്രം. ബാംഗ്ലൂരിനായി ശിവം ദുബെ രണ്ടും യുസ്‌വേന്ദ്ര ചാഹൽ ഒരു വിക്കറ്റും വീഴ്ത്തി.