ഭുവനേശ്വര്‍: ഹോക്കി ലോകകപ്പില്‍ സമനില പിടിച്ച് ഇന്ത്യ-ബെല്‍ജിയം മല്‍സരം. ഇരുടീമും രണ്ടുഗോള്‍ വീതം നേടി. ബെല്‍ജിയത്തിന് വേണ്ടി അലക്‌സാണ്ടര്‍ ഹെന്‍ഡ്രിക്‌സ് ആദ്യ ഗോള്‍ നേടി. എന്നാല്‍ ഹര്‍മന്‍പ്രീത് സിംഗ് ഇന്ത്യയ്ക്കായി ഗോള്‍ മടക്കി. സിമ്രന്‍ജിത്് സിംഗിന്റെ ഗോളിലൂടെ ഇന്ത്യ മുന്നിലെത്തിയെങ്കിലും കളി അവസാനിക്കാന്‍ മൂന്ന് മിനിറ്റ് ബാക്കി നില്‍ക്കെ ഗോള്‍ തിരിച്ചടിച്ച് ബെല്‍ജിയം ഇന്ത്യക്ക് ഒപ്പം എത്തി.
കളി സമനില വഴങ്ങിയെങ്കിലും ഇന്ത്യ ഗ്രൂപ്പില്‍ ഗോള്‍ ശരാശരിയുടെ മികവില്‍ ഒന്നാം സ്ഥാനത്തെത്തി. കാനഡക്കെതിരെയാണ് ഇന്ത്യയുടെ അവസാന മല്‍സരം. ഇന്നത്തെ ആദ്യ മല്‍സരത്തില്‍ കാനഡയും ദക്ഷിണാഫ്രിക്കയും സമനിലയില്‍ പിരിഞ്ഞു. ഇരുടീമും ഓരോഗോള്‍ വീതം നേടി.
ഇന്ത്യയുടെ രണ്ടാം മത്സരമാണിത്. ആദ്യ മത്സരത്തില്‍ മറുപടിയില്ലാത്ത അഞ്ച് ഗോളിന് ദക്ഷിണാഫ്രിക്കയെ ഇന്ത്യ തകര്‍ത്തിരുന്നു.