തൃശ്ശൂര്‍: തൃശ്ശൂര്‍ എന്നും ഹൃദയത്തില്‍ ഉണ്ടാകും, എന്റെ പ്രവര്‍ത്തനങ്ങള്‍ക്ക് ഊര്‍ജ്ജം നല്‍കിയ സ്‌നേഹത്തിന് നന്ദി. തെരഞ്ഞെടുപ്പ് ഫലം വന്നശേഷം തൃശ്ശൂരിന് നന്ദി അറിയിച്ചു കൊണ്ട് എന്‍ഡിഎ സ്ഥാനാര്‍ത്ഥി സുരേഷ് ഗോപി രംഗത്ത്. ഫേസ്ബുക്കിലൂടെയാണ് താരം തൃശ്ശൂരിന് നന്ദി രേഖപ്പെടുത്തിയത്.
കുറച്ച് ദിവസം തന്റെ ഒപ്പം സഞ്ചരിച്ച തൃശ്ശൂരിലെ അമ്മമാരെയും പൂരക്കാഴ്ച കൊഴുപ്പിച്ച തെച്ചിക്കോട്ടുകാവ് രാമചന്ദ്രനെയും പ്രത്യേകം പരാമര്‍ശിച്ചാണ് സുരേഷ് ഗോപി തൃശ്ശൂരിനോടുള്ള നന്ദി രേഖപ്പെടുത്തിയത്. ഒപ്പം വീണ്ടും ജയിച്ചു കയറിയ നരേന്ദ്ര മോഡിക്ക് അഭിനന്ദനങ്ങളും അറിയിച്ചു.
തൃശ്ശൂരില്‍ സുരേഷ് ഗോപിയുടെ ‘മാസ് എന്‍ട്രി’ മറ്റു രണ്ടു മുന്നണികള്‍ക്കും തിരിച്ചടിയാവുമോയെന്ന ഭയം ഉയര്‍ത്തിയിരുന്നു. താരത്തിന്റെ തെരഞ്ഞെടുപ്പ് പ്രചാരണവും ആശങ്കകള്‍ക്ക് വഴി വെച്ചു. എന്നാല്‍ ലോക്‌സഭാ സീറ്റ് നേടാനായില്ലെങ്കില്‍ ഭാവിയില്‍ നിയസഭാ സീറ്റെങ്കിലും പിടിച്ചെടുക്കാനായി തൃശ്ശൂരിലെത്തിയ സുരേഷ് ഗോപിക്ക് ഒരു നിയമസഭാ മണ്ഡലത്തില്‍ പോലും ഒന്നാമതെത്താനായില്ല. ഇത് ബിജെപിയുടെ തൃശ്ശൂരിലെ ഭാവി പ്രതീക്ഷകളും തകര്‍ത്തെറിഞ്ഞു.
ഫേസ്ബുക്ക് പോസ്റ്റ് ഇങ്ങനെ;
തൃശ്ശൂര്‍ എന്നും ഉണ്ടാകും ഈ ഹൃദയത്തില്‍…!
എന്റെ പ്രവര്‍ത്തനങ്ങള്‍ക്ക് ഊര്‍ജ്ജം നല്‍കിയ സ്‌നേഹത്തിന് നന്ദി!
എന്റെ വിശപ്പടക്കിയ
എന്നെ ചേര്‍ത്തു പിടിച്ച
കുറച്ചു ദിവസം എന്റെയൊപ്പം സഞ്ചരിച്ച തൃശ്ശൂരിലെ എല്ലാ അമ്മമാര്‍ക്കും സ്‌നേഹിതര്‍ക്കും പ്രവര്‍ത്തകര്‍ക്കും തൃശ്ശൂര്‍കാര്‍ക്കും പിന്നെ പൂരക്കാഴ്ച കൊഴുപ്പിച്ച തെച്ചിക്കോട്ട് രാമചന്ദ്രനും നന്ദി!
ഒപ്പം ലോകത്തിലെ ഏറ്റവും ജനസമ്മതനായ നേതാവായി ഉയര്‍ന്ന എന്റെ, രാജ്യത്തിന്റെ സ്വന്തം നരേന്ദ്ര മോഡിജിക്ക് അഭിനന്ദനങ്ങള്‍…!’ ശക്തമായ ത്രികോണ മത്സരം നടന്ന മണ്ഡലത്തില്‍ സുരേഷ് ഗോപി മൂന്ന് ലക്ഷത്തിനടുത്ത് വോട്ടുകള്‍ സ്വന്തമാക്കിയിരുന്നു.
