ഷാര്‍ജ: ഷാര്‍ജയിലെ ലുലു ഹൈപ്പര്‍മാര്‍ക്കറ്റില്‍ ആയുധങ്ങളുമായി കൊള്ളയടിക്കാനെത്തിയ സംഘം മിനിറ്റുകള്‍ക്കുള്ളില്‍ ഷാര്‍ജ പോലീസിന്റെ വലയില്‍ കുടുങ്ങി. രണ്ട് ആഫ്രിക്കന്‍ സ്വദേശികളാണ് പോലീസിന്റെ പിടിയിലായത്. മാര്‍ച്ച് രണ്ടിനാണ് ജീവനക്കാരെയടക്കം ഞെട്ടിച്ച് ഹൈപ്പര്‍മാര്‍ക്കറ്റിനുള്ളില്‍ അക്രമി സംഘം എത്തിയത്.
ഹൈപ്പര്‍മാര്‍ക്കറ്റിലെ കാഷ്യറെ ആക്രമിച്ച് പണമടങ്ങിയ പെട്ടിയും കൊണ്ട് കടക്കാനാണ് അക്രമികള്‍ ശ്രമിച്ചത്. എന്നാല്‍ ഹൈപ്പര്‍മാര്‍ക്കറ്റിലെ ജീവനക്കാര്‍ അക്രമികളെ എതിരിടുകയായിരുന്നു. പെട്ടെന്നു തന്നെ പോലീസ് സ്ഥലത്തെത്തിയതോടെ കൊള്ളസംഘത്തില്‍ പെട്ട ഒരാളെ ഉടന്‍ അറസ്റ്റു ചെയ്തു. മറ്റെയാള്‍ ഓടി രക്ഷപ്പെടാന്‍ ശ്രമിക്കുന്നതിനിടെ പോലീസ് പിടിയിലാവുകയും ചെയ്തു.
അതേസമയം, കൊള്ളസംഘത്തെ തടയാന്‍ ശ്രമിച്ചതിനിടെ രണ്ട് ജീവനക്കാര്‍ക്ക് നിസാര പരുക്കുകളുണ്ട്. ഇവരെ ഉടന്‍ ആശുപത്രിയലെത്തിച്ചു.
Discussion about this post