അബുദാബി: പ്രവാസി വ്യവസായിയും മലയാളിയുമായ എംഎ യൂസഫലി സ്വന്തമാക്കിയ പുതിയ പ്രൈവറ്റ് ജെറ്റാണ് ഇപ്പോൾ വാർത്തയിൽ താരം. 500 കോടിയോളം വിലവരുന്ന ഗൾഫ് സ്ട്രീം ജി 600 വിമാനമാണ് ഇനി യൂസഫലിക്ക് യാത്ര ഒരുക്കുക. 19 പേർക്ക് സഞ്ചരിക്കാവുന്ന ഈ ചെറു വിമാനത്തിൽ 10 പേർക്ക് കിടന്ന് സഞ്ചരിക്കാനുള്ള സൗകര്യവുമുണ്ട്.
അമേരിക്കൻ കമ്പനിയായ ജനറൽ ഡൈനാമിക്‌സിന്റെ ഉടമസ്ഥതയിലുള്ള ഗൾഫ് സ്ട്രീം എയ്‌റോസ്‌പെയ്‌സാണ് വിമാനത്തിന്റെ നിർമാതാക്കൾ. ടി7-വൈഎംഎ രജിസ്‌ട്രേഷനിലുള്ള വിമാനമാണിത്. പ്രാറ്റ് ആൻഡ് വിറ്റ്‌നിയുടെ എൻജിനുപയോഗിച്ചാണ് ഈ വിമാനം പറക്കുക. 6600 നോട്ടിക്കൽ മൈൽ വരെ ഒരു കുതിപ്പിൽ താണ്ടും. 925 കി.മീ വരെയാണ് പരമാവധി വേഗത.
ഗൾഫ് സ്ട്രീം ജി 600 ലോകത്തിലെ ഏറ്റവും വേഗമുള്ള ലോങ് റേഞ്ച് പ്രൈവറ്റ് ജെറ്റാണെന്ന് കമ്പനി അവകാശപ്പെടുന്നു. 96.1 അടി നീളവും 25.3 അടി ഉയരവുമുള്ള വിമാനത്തിന് 94.2 അടിയാണ് ചിറകുവിരിവ്.
51000 അടി ഉയരത്തിൽ വരെ പറക്കുന്ന ഈ ആഡംബര വിമാനത്തിലെ സുരക്ഷാ സൗകര്യങ്ങളും ആകർഷണീയമാണ്. അതേസമയം, നേരത്തെ ഉപയോഗിച്ചിരുന്ന എ6-വൈഎംഎ ഗൾഫ്‌സ്ട്രീം ജി-550 വിമാനം യൂസഫലി വിൽക്കാൻ തീരുമാനിച്ചിരിക്കുകയാണ്.
എട്ട് വർഷം പഴക്കമുള്ളതാണ് ഈ വിമാനം. ആകെ 3065 മണിക്കൂറുകൾ പറന്നിട്ടുണ്ട്. 2016ലാണ് 350 കോടിയിലധികം രൂപ ചെലവഴിച്ച് എംഎ യൂസഫലി ഗൾഫ്‌സ്ട്രീം ജി-550 വിമാനം സ്വന്തമാക്കിയത്. ലെഗസി 650 വിമാനമായിരുന്നു അതിന് മുമ്പ് ഉപയോഗിച്ചിരുന്നത്.
Discussion about this post