അല്‍ഐന്‍: അമിതവേഗത്തില്‍ വാഹനം ഓടിച്ചും, അതിസാഹസികമായി യാത്ര ചെയ്ത യുവാവിന് വാഹനം മറിഞ്ഞ് ദാരുണാന്ത്യം. അമിത വേഗത്തില്‍ എത്തിയ വാഹനത്തിന് പോലീസ് കൈ കാണിച്ചുവെങ്കിലും പോലീസിന് നേരെ നിറയൊഴിച്ച് ഇയാള്‍ പോവുകയായിരുന്നു. ശേഷം സാഹസിക പ്രകടനത്തിന് അന്ത്യം കുറിച്ച് വാഹനം മറിയുകയായിരുന്നു.
പൊതുനിരത്തില്‍ സാഹസിക പ്രകടനം നടത്തിയ ഇയാളോട് വാഹനം നിര്‍ത്താന്‍ പട്രോളിങ് ഉദ്യോഗസ്ഥര്‍ ആവശ്യപ്പെട്ടെങ്കിലും കുതിച്ചുപായുകയായിരുന്നുവെന്ന് പബ്ലിക് പ്രോസിക്യൂഷന്‍ വ്യക്തമാക്കി. മുന്നറിയിപ്പായി പോലീസ് 2 റൗണ്ട് ആകാശത്തേക്കു നിറയൊഴിച്ചെങ്കിലും ഫലമുണ്ടായില്ല. ഇതിനിടെ, ഇയാള്‍ പോലീസിനു നേര്‍ക്കു വെടിവച്ചു.
അതിവേഗത്തില്‍ പാഞ്ഞ വാഹനം ഒടുവില്‍ പോലീസ് വാഹനവുമായി കൂട്ടിയിടിച്ചാണ് മറിഞ്ഞത്. സാരമായി പരുക്കേറ്റ ഇയാളെ ആശുപത്രിയില്‍ പ്രവേശിപ്പിച്ചെങ്കിലും മരിച്ചു. ഇത്തരം പ്രകടനങ്ങള്‍ സ്വന്തം ജീവന്‍ മാത്രമല്ല, നിരപരാധികളുടെ ജീവനും ഭീഷണിയാണെന്നു പ്രോസിക്യൂഷന്‍ വ്യക്തമാക്കി. യുവാവ് ഏതുനാട്ടുകാരനാണെന്നും മറ്റുമുള്ള വിവരങ്ങള്‍ യാതൊന്നും പുറത്ത് വിട്ടിട്ടില്ല.