ദുബായ്: വീണ്ടും മലയാളിയെ കോടീശ്വരനാക്കി അബുദാബി ബിഗ് ടിക്കറ്റ് നറുക്കെടുപ്പ്. മലയാളിയായ 24 കാരന് കെപി പ്രദീപാണ് 20 മില്യന്‍ ദിര്‍ഹ(44 കോടി രൂപ)ത്തിന്റെ ഒന്നാം സമ്മാനം നേടിയത്. ജബല്‍ അലിയിലെ കാര്‍ കമ്പനിയില്‍ ജോലി ചെയ്യുകയാണ് കെപി പ്രദീപ്.
അബുദാബി ബിഗ് ടിക്കറ്റിന്റെ 244-ാം സീരീസ് നറുക്കെടുപ്പിലാണ് പ്രദീപ് വിജയിയായത്. 064141 നമ്പര്‍ ടിക്കറ്റിനാണ് സമ്മാനം. പ്രദീപും അദ്ദേഹത്തിന്റെ 20 സഹപ്രവര്‍ത്തകരും ചേര്‍ന്ന് സെപ്റ്റംബര്‍ 13 നാണ് ഓണ്‍ലൈനായി ടിക്കറ്റ് വാങ്ങിയത്. 44 കോടി രൂപയുടെ സമ്മാനം ഇവര്‍ പങ്കിട്ടെടുക്കുമെന്ന് പ്രദീപ് പറഞ്ഞു.
അതേസമയം, നറുക്കെടുത്ത വിജയത്തെക്കുറിച്ച് അറിയിക്കാന്‍ അധികൃതര്‍ ബന്ധപ്പെട്ടപ്പോള്‍ പ്രദീപ് ജോലിയിലായിരുന്നു. സമ്മാനം ലഭിച്ചെന്ന് പ്രദീപിന് വിശ്വസിക്കാന്‍ കഴിഞ്ഞിരുന്നില്ല. പണം എങ്ങനെ ചെലവഴിക്കും എന്ന ചോദ്യത്തിന്, സമ്മാനം ലഭിക്കുമെന്ന് പ്രതീക്ഷിക്കാത്തതിനാല്‍ പദ്ധതികളൊന്നും തയാറാക്കിയിട്ടില്ലെന്നാണ് പ്രദീപിന്റെ വാക്കുകള്‍.
നറുക്കെടുപ്പില്‍ ദുബായില്‍ നിന്നുള്ള ഇന്ത്യന്‍ പ്രവാസിയായ അബ്ദുള്‍ ഖാദര്‍ ഡാനിഷ് എന്നയാള്‍ക്ക് 10 ലക്ഷം ദിര്‍ഹം രണ്ടാം സമ്മാനം ലഭിച്ചു. ഇന്ത്യക്കാരായ ഷാജി പുതിയ വീട്ടില്‍, മുഹമ്മദ് അലി പാറത്തൊടി എന്നിവര്‍ക്ക് നറുക്കെടുപ്പില്‍ ജീപ്പ് ഗ്രാന്‍ഡ് സമ്മാനമായി ലഭിച്ചിട്ടുണ്ട്.