അബുദാബി: മലയാളികളായ യുവാക്കള്‍ക്ക് അബുദാബിയില്‍ വാഹനാപകടത്തില്‍ ദാരുണാന്ത്യം. കണ്ണൂര്‍ ജില്ലയിലെ പിണറായി സ്വദേശികളും സുഹൃത്തുക്കളുമായ റഫിനീദ് വലിയപറമ്പത്ത് റഹീം(28), റാഷിദ് നടുക്കണ്ടികണ്ണോത്ത് കാസിം(28) എന്നിവരാണ് മരിച്ചത്.
വെള്ളിയാഴ്ച പുലര്‍ച്ചെയാണ് അപകടം സംഭവിച്ചത്. ബനിയാസ് പോലീസ് സ്റ്റേഷന്‍ മുന്നില്‍ വെച്ച് നടന്ന അപകടത്തില്‍ സംഭവസ്ഥലത്തുവച്ചുതന്നെ ഇരുവരും മരിച്ചു. റഫിനീദ് ബനിയാസില്‍ ഓഫീസ് ബോയ് ആയും റാഷിദ് സെയില്‌സ്മാനായും ജോലി ചെയ്തുവരികയിരുന്നു.
ഇരുവരും അവിവാഹിതരാണ്. കാസിം-റസിയ ദമ്പതികളുടെ മകനാണ് റാഷിദ്. ചെറുപ്പം മുതല്‍ അടുത്ത സുഹൃത്തുക്കളാണ് റഫിനീദും റാഷിദും. അബുദാബിയില്‍ രണ്ട് സ്ഥലങ്ങളിലാണ് ഇവര്‍ താമസിച്ചിരുന്നത്. എന്നാല്‍ വാരാന്ത്യങ്ങളില്‍ ഇരുവരും കാണാറുണ്ടായിരുന്നു.
ഇത്തരത്തിലുള്ള ഒരു കൂടിക്കാഴ്ച ഇരുവരുടെയും അവസാനത്തേതായതിന്റെ നടുക്കത്തിലാണ് സുഹൃത്തുക്കളും ബന്ധുക്കളും. ഷഹാമ സെന്‍ട്രല്‍ മോര്‍ച്ചറിയില് സൂക്ഷിച്ചിരിക്കുകയാണ് മൃതദേഹം. നിയമനടപടികള്‍ക്ക് ശേഷം ഞായറാഴ്ച നാട്ടിലേക്ക് കൊണ്ടുപോയേക്കും.
Discussion about this post