അബുദാബി: അബുദാബിയില്‍ തൊഴിലാളികള്‍ സഞ്ചരിച്ച ബസുകള്‍ കൂട്ടിയിടിച്ച് മൂന്നു പേര്‍ മരിച്ചു. ഒട്ടേറെ പേര്‍ക്ക് പരുക്കേറ്റു. ഇന്ന് രാവിലെയായിരുന്നു സംഭവം. അബുദാബി അല്‍ ഫയാ-സായിഹ് ശു ഐബ് ട്രക്ക് റോഡില്‍ വെച്ചാണ് ബസ്സുകള്‍ കൂട്ടിയിടിച്ചത്.
അപകടത്തില്‍ മരിച്ചവരും പരുക്കേറ്റവരുമെല്ലാം ഏഷ്യക്കാരാണ്. നിര്‍മാണ തൊഴിലാളികള്‍ സഞ്ചരിച്ച വലിയ ബസും ചെറിയ ബസും തമ്മിലായിരുന്നു കൂട്ടിയിടിച്ചത്. മൂന്നുപേര്‍ സംഭവസ്ഥലത്തുവെച്ചുതന്നെ മരിച്ചു. പരിക്കേറ്റവരെ ഉടന്‍ തന്നെ ആശുപത്രിയില്‍ പ്രവേശിപ്പിച്ചു.
കനത്ത മൂടല്‍മഞ്ഞ് മൂലം ചെറിയ ബസിന്റെ ഡ്രൈവര്‍ അശ്രദ്ധമായി ലൈന്‍ മാറി വലിയ ബസിന് ഇടിക്കുകയായിരുന്നുവെന്ന് അബുദാബി പൊലീസ് പറഞ്ഞു മൂടല്‍ മഞ്ഞുള്ളപ്പോള്‍ വാഹനങ്ങള്‍ ഏറെ ജാഗ്രത പുലര്‍ത്തണമെന്ന് പൊലീസ് ആവര്‍ത്തിച്ച് നിര്‍ദേശിച്ചു.
മരിച്ചവരെയും പരുക്കേറ്റവരെയും കുറിച്ച് കൂടുതല്‍ വിവരങ്ങള്‍ ലഭ്യമായിട്ടില്ല. കനത്ത മൂടല്‍മഞ്ഞ് കാരണം ദുബായില്‍ ഇന്നലെ അര്‍ധരാത്രി മുതല്‍ രാവിലെ വരെ 9 മണിക്കൂറിനുള്ളില്‍ 29 വാഹനാപകടങ്ങള്‍ റിപ്പോര്‍ട്ട് ചെയ്തിട്ടുണ്ടെന്ന് അധികൃതര്‍ അറിയിച്ചു.
Discussion about this post