ദുബായ്: കൊവിഡ് മഹാമാരി കാലത്തെ സാമ്പത്തിക പ്രതിസന്ധിക്ക് ഇടയിലും കോടികൾ സമ്മാനവുമായി പ്രവാസി ഇന്ത്യക്കാരനായ നിതീേഷിനെ തേടിയെത്തി ഭാഗ്യദേവത. കഴിഞ്ഞ ദിവസം നറുക്കെടുത്ത 337 ാം സീരീസിലെ ദുബായ് ഡ്യൂട്ടി ഫ്രീ നറുക്കെടുപ്പിലൂടെയാണ് നിതേഷ് സുഗ്നാനിയെ തേടി ഭാഗ്യം എത്തിയത്. 2321 എന്ന നമ്പറിലൂടെ 7കോടിയിലേറെ രൂപയാണ് (10 ലക്ഷം ഡോളർ) ഇദ്ദേഹത്തിന് സ്വന്തമായത്.
ദുബായ് നോളജ് ആന്റ് ഹ്യൂമൺ ഡെവലപ്മെന്റ് അതോറിറ്റി ഉദ്യോഗസ്ഥനാണ് നിതേഷ്. 30 വർഷമായി ദുബായിൽ താമസിക്കുന്ന നിതേഷ് ഓഗസ്റ്റ് 13നാണ് ഓൺലൈൻ വഴി സമ്മാനാർഹമായ ടിക്കറ്റ് എടുത്തത്. കഴിഞ്ഞ 15 വർഷമായി ഡ്യൂട്ടി ഫ്രീ നറുക്കെടുപ്പിൽ ഭാഗ്യപരീക്ഷണം നടത്താറുണ്ടെന്ന് നിതേഷ് പറയുന്നു.
മുമ്പ് 2011ൽ ഫൈനസ്റ്റ് സർപ്രൈസ് നറുക്കെടുപ്പിലൂടെ ബിഎംഡബ്ല്യൂ കാർ നിതേഷിന് സമ്മാനമായി ലഭിച്ചിരുന്നു. 1995ലെ നറുക്കെടുപ്പിൽ പിതാവിനും ദുബായ് ഡ്യൂട്ടി ഫ്രീ നറുക്കെടുപ്പിലൂടെ ബിഎംഡബ്ല്യൂ കാർ സമ്മാനമായി ലഭിച്ചിട്ടുണ്ടെന്ന് നിതേഷ് പറയുന്നു. മില്ലേനിയം മില്യനയർ നറുക്കെടുപ്പ് തുടങ്ങിയ ശേഷം സമ്മാനം ലഭിക്കുന്ന 167ാമത്തെ ഇന്ത്യക്കാരനാണ് നിതേഷ്.
‘ഒരു ദിവസം വീണ്ടും ജയിക്കുമെന്ന് ഞാൻ എപ്പോഴും വിശ്വസിച്ചിരുന്നു. എല്ലാ തവണയും ആർക്കെങ്കിലും സമ്മാനം ലഭിച്ചെന്ന വാർത്ത കേൾക്കുമ്പോഴൊക്കെ സന്തോഷം തോന്നാറുണ്ട്. ഇപ്പോൾ അടക്കാനാവാത്ത സന്തോഷമാണുള്ളത്. ലോകത്ത് എവിടെയാണ് നിങ്ങൾക്ക് ഇത്തരത്തിലുള്ള അവസരം കണ്ടെത്താൻ കഴിയുക ദുബായിയിലും ദുബായ് ഡ്യൂട്ടി ഫ്രീയിലും മാത്രം’, നിതേഷ് സുഗ്നാനി പറയുന്നു. ഭാര്യയോടും മകളോടുമൊപ്പമാണ് നിതേഷ് ദുബായിയിലാണ് സ്ഥിരതാമസം.
Discussion about this post