റിയാദ്: സൗദി അറേബ്യയിലെ പ്രവാസികള്‍ക്ക് നാട്ടിലേക്ക് മടങ്ങാന്‍ പുതിയ സംവിധാനം ഏര്‍പ്പെടുത്തി സൗദി. ‘ഔദ’ എന്ന പേരിലുള്ള പുതിയ സൗകര്യം നിലവില്‍ എക്‌സിറ്റ് റീ എന്‍ട്രി, എക്‌സിറ്റ് വിസ കയ്യിലുള്ളവര്‍ക്ക് ഉപയോഗപ്പെടുത്താം. തീര്‍ത്തും ഒഴിച്ചു കൂടാനാവാത്ത സാഹചര്യത്തില്‍ നാട്ടില്‍ പോകണമെന്നുള്ളവര്‍ക്ക് ഉപയോഗിക്കാനുള്ള സംവിധാനമാണിത്.
സൗദി ജവാസത്തിന്റെ ‘അബ്ഷിര്‍’ വഴിയാണ് ഓണ്‍ലൈനായി ഇതിന് അപേക്ഷ നല്‍കേണ്ടത്. അപേക്ഷ സ്വീകരിച്ചാല്‍ യാത്രയുടെ തിയതി, ടിക്കറ്റ് നമ്പര്‍, ബുക്കിങ് വിവരങ്ങള്‍ എന്നിവ വ്യക്തമാക്കി കൊണ്ടുള്ള സന്ദേശം അപേക്ഷകെന്റെ മൊബൈല്‍ നമ്പറില്‍ ലഭിക്കും. ഇതനുസരിച്ച് അപേക്ഷകന് യാത്രയ്ക്കുള്ള ഒരുക്കങ്ങള്‍ നടത്താം.
‘അബ്ഷിര്‍’ പോര്‍ട്ടല്‍ സന്ദര്‍ശിച്ച് ‘ഔദ’ എന്ന ഐക്കണ്‍ സെലക്ട് ചെയ്യണം. ശേഷം കാണുന്ന കോളത്തില്‍ ഇഖാമ നമ്പര്‍, ജനന തീയതി, മൊബൈല്‍ നമ്പര്‍, പുറപ്പെടുന്ന നഗരം, എത്തിച്ചേരേണ്ട വിമാനത്താവളം എന്നീ വിവരങ്ങള്‍ പൂരിപ്പിക്കണം.
നിലവില്‍ അബ്ഷിര്‍ പോര്‍ട്ടലില്‍ അക്കൗണ്ട് ഇല്ലാത്തവര്‍ക്കും ഈ സൗകര്യം ഉപയോഗപ്പെടുത്താം. റിയാദ് കിങ് ഖാലിദ്, ജിദ്ദ കിങ് അബ്ദുല്‍ അസീസ്, മദീന അമീര്‍ മുഹമ്മദ് ബിന്‍ അബ്ദുല്‍ അസീസ്, ദമ്മാം കിങ് ഫഹദ് എന്നീ അന്താരാഷ്ട്ര വിമാനത്താവളങ്ങള്‍ വഴിയായിരിക്കും യാത്ര. ഈ നഗരങ്ങള്‍ക്ക് പുറത്തുള്ള വിദേശികള്‍ക്കും ഈ സേവനം ലഭിക്കും.
Discussion about this post