തൃശ്ശൂര്: വരുന്ന ലോക്സഭാ തെരഞ്ഞെടുപ്പില് തൃശ്ശൂര് സീറ്റ് ബിഡിജെഎസിന് നല്കാനുള്ള നീക്കങ്ങള്ക്കെതിരെ ബിജെപി ജില്ലാ നേതൃത്വം രംഗത്ത്. പാര്ട്ടിയുടെ സ്ഥാനാര്ത്ഥിയെ തന്നെ തൃശ്ശൂരില് മത്സരിപ്പിക്കണമെന്ന് ജില്ലാ പ്രസിഡന്റ് എ നാഗേഷ് ആവശ്യപ്പെട്ടു. അതേസമയം, തുഷാര് വെള്ളാപ്പള്ളി മത്സരിക്കാന് തയ്യാറായാല് തൃശ്ശൂര് നല്കാമെന്നാണ് ബിജെപി സംസ്ഥാന നേതൃത്വത്തിന്റെ നിലപാട്.
കെ സുരേന്ദ്രന്, എഎന് രാധാകൃഷ്ണന് തുടങ്ങിയ സീനിയര് നേതാക്കള് മത്സരിക്കാന് താത്പര്യപ്പെടുന്ന സീറ്റാണ് തൃശ്ശൂര്. പക്ഷെ ബിഡിജെഎസ് ആവശ്യപ്പെട്ട എട്ട് സീറ്റുകളില് ബിജെപി ഏറെ പ്രതീക്ഷ വെക്കുന്ന ഈ എ പ്ലസ് മണ്ഡലവുമുണ്ട്. എന്നാല് തുഷാര് മത്സരിക്കാന് തയ്യാറായാല് തൃശ്ശൂര് നല്കാമെന്ന ബിജെപി സംസ്ഥാന നേതൃത്വം ബിഡിജെഎസിനെ അറിയിച്ചു. പക്ഷെ മത്സരിക്കാനില്ലെന്ന നിലപാടിലാണ് തുഷാര്. ഇതിനിടെയാണ് ജില്ലാ നേതൃത്വം നിലപാട് വ്യക്തമാക്കിയത്.
കെ സുരേന്ദ്രനെ മത്സരിപ്പിച്ചാല് തൃശ്ശൂരില് ജയസാധ്യതയുണ്ടെന്നാണ് സംസ്ഥാന പ്രസിഡന്റുമായുള്ള കൂടിക്കാഴ്ചയില് ജില്ലാ നേതൃത്വം അറിയിച്ചത്. ശബരിമല പ്രശ്നത്തോടെ കെ സുരേന്ദ്രന്റെ വിജയസാധ്യത ഏറിയെന്നും ജില്ലാ നേതൃത്വം കണക്കുകൂട്ടുന്നു.
Discussion about this post