കലിഫോര്‍ണിയ: അമേരിക്കയില്‍ സാഹസിക യാത്രക്കിടെ 800 അടി താഴ്ചയുള്ള കൊക്കയിലേക്ക് വീണ് മരിച്ച മലയാളി ദമ്പതികളുടെ പോസ്റ്റ്‌മോര്‍ട്ടം റിപ്പോര്‍ട്ട് പുറത്ത്. കണ്ണൂര്‍ കതിരൂര്‍ സ്വദേശി വിഷ്ണു വിശ്വനാഥന്‍, കോട്ടയം സ്വദേശിനി മീനാക്ഷി എന്നിവരാണ് ഒക്ടോബറില്‍ കലിഫോര്‍ണിയയില്‍ യോസെമൈറ്റ് വാലിയിലെ നാഷനല്‍ പാര്‍ക്കില്‍ അപകടത്തില്‍ മരിച്ചത്. മരണസമയത്ത് ഇരുവരും മദ്യപിച്ചിരുന്നതായാണ് റിപ്പോര്‍ട്ടിലെ കണ്ടെത്തല്‍.
ഇരുവരുടെയും തല, കഴുത്ത്, വയര്‍ എന്നിവിടങ്ങളില്‍ മാരകമായ പരിക്കേറ്റിരുന്നു. മറ്റു ലഹരികളൊന്നും ഇവരുടെ ശരീരത്തിലുണ്ടായിരുന്നെന്നും പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നതായി ഡെയ്‌ലി മെയ്ല്‍ റിപ്പോര്‍ട്ട് ചെയ്തു.
പാര്‍ക്കിലെ ഏറെ പ്രശസ്തമായ ടാഫ്റ്റ് പോയിന്റില്‍നിന്നാണ് ഇരുവരും കൊക്കയിലേക്ക് വീണത്. സെല്‍ഫിയെടുക്കുന്നതിനിടെയാണ് വീണതെന്നാണ് കരുതുന്നതെങ്കിലും വീഴ്ചയുടെ കാരണം വ്യക്തമായിരുന്നില്ല.
ചെങ്ങന്നൂരില്‍ ഐഎച്ച്ആര്‍ഡി എന്‍ജിനീയറിംഗ് കോളജില്‍ സഹപാഠികളായിരുന്ന ഇരുവരും നാലു വര്‍ഷം മുമ്പാണ് വിവാഹിതരായത്. നേരത്തേ ന്യൂയോര്‍ക്കിലായിരുന്നു ഇരുവരും. അടുത്തിടെ വിഷ്ണുവിന് സിസ്‌കോ സോഫ്റ്റ് വെയര്‍ കമ്പനി എന്‍ജിനീയറായി ജോലി കിട്ടിയതോടെയാണ് ഇരുവരും കലിഫോര്‍ണിയയിലെത്തിയത്.
ഏറെ യാത്രാപ്രിയരായ ഇരുവരും ലോകത്തിന്റെ വിവിധ ഭാഗങ്ങളില്‍ സാഹസിക യാത്രകള്‍ നടത്തിയിരുന്നു. തങ്ങളുടെ യാത്രാ വിശേഷങ്ങള്‍ പങ്കുവയ്ക്കുന്നതിനായി ഹോളിഡേസ് ആന്‍ഡ് ഹാപ്പിലി എവര്‍ ആഫ്‌റ്റേഴ്‌സ് എന്ന ബ്ലോഗും ഇവര്‍ കൈകാര്യം ചെയ്തിരുന്നു.
Discussion about this post