പ്രാഗ്: തന്റെ സബ്‌സ്‌ക്രൈബേഴ്‌സ് ഉള്‍പ്പടെയുള്ള പ്രേക്ഷകര്‍ക്ക് 10 ലക്ഷം ഡോളര്‍ സമ്മാനമായി നല്‍കാന്‍ ഹെലികോപ്റ്ററില്‍ പറന്നെത്തി പണം വിതറി സോഷ്യല്‍ മീഡിയ ഇന്‍ഫ്ളുവന്‍സര്‍. ചെക്ക് റിപബ്ലിക്കിലെ പ്രമുഖ ഇന്‍ഫ്ളുവന്‍സറും ടെലിവിഷന്‍ അവതാരകനുമായ കാമില്‍ ബര്‍തോഷെക്കാണ് ഈ വിചിത്രമായ പ്രവര്‍ത്തി ചെയ്തത്.
പണം താഴേക്കിടുന്ന സ്ഥലവും സമയവും ആളുകളെ മുന്‍കൂട്ടി അറിയിച്ചാണ് കാമില്‍ ഹെലികോപ്റ്ററില്‍ എത്തിയത്. കൃത്യസമയത്ത് തന്നെ ഉറപ്പുനല്‍കിയതു പോലെ കാമില്‍ പണം ഹെലികോപ്റ്ററില്‍ നിന്ന് താഴേക്കിടുകയായിരുന്നു. ചെക്ക് റിപബ്ലിക്കിലെ ലിസ നാഡ് ലബേമിനു സമീപം ഹെലികോപ്റ്ററില്‍ പറന്നെത്തിയാണ് കാമില്‍ പണം താഴേക്കിട്ടത്.
ഈ സമയത്ത് ആയിരക്കണക്കിനാളുകളാണ് പണം ശേഖരിക്കാനായി എത്തിയത്. ഒരു മണിക്കൂറിനുള്ളില്‍ കാമില്‍ വിതറിയ നോട്ടുകള്‍ മുഴുവന്‍ കൈയില്‍ കരുതിയ ബാഗുകളിലും പ്ലാസ്റ്റിക് കവറുകളിലുമാക്കി ആളുകള്‍ സ്ഥലം വിടുകയും ചെയ്തു.
ഇതിനിടെ ചിലര്‍ കുടകളില്‍ വരെ നോട്ടുകള്‍ വാരിക്കൂട്ടി. ലോകത്തിലെ ആദ്യത്തെ യഥാര്‍ത്ഥ പണമഴ എന്നാണ് കാമില്‍ ഈ പ്രവര്‍ത്തയെ വിശേഷിപ്പിക്കുന്നത്. അതേസമം, പണം വാരിക്കൂട്ടാനുള്ള തിക്കിലും തിരക്കിലുംപെട്ട് ആര്‍ക്കും പരിക്ക് പറ്റിയിട്ടിട്ടില്ലെന്നാണ് കാമില്‍ പറയുന്നത്.
Discussion about this post