ദുബായ്: അക്കൗണ്ട് മാറി ട്രാന്‍സ്ഫര്‍ ആയി വന്ന 1.28 കോടിയോളം രൂപ (570,000 ദിര്‍ഹം) തിരികെ നല്‍കാന്‍ വിസമ്മതിച്ച ഇന്ത്യന്‍പ്രവാസി യുവാവിന് ദുബായ്‌യില്‍ തടവുശിക്ഷ. ദുബായ് ക്രിമിനല്‍ കോടതി ഒരു മാസത്തേക്കാണ് ഇയാളെ തടവിന് ശിക്ഷിച്ചത്. ഇതേ തുക പിഴയായി അടക്കണമെന്നും ശിക്ഷ കഴിഞ്ഞ് നാടുകടത്തണമെന്നും കോടതി നിര്‍ദേശിച്ചു.
കഴിഞ്ഞ വര്‍ഷം ഒക്ടോബറിലാണ് ബാങ്ക് അക്കൗണ്ട് തെറ്റി 1.28 കോടിയോളം രൂപ യുവാവിന് ലഭിച്ചത്. ഒരു മെഡിക്കല്‍ ട്രേഡിംഗ് കമ്പനിയില്‍ നിന്നുള്ള പണമാണ് യുവാവിന്റെ അക്കൗണ്ടിലേക്ക് മാറി എത്തിയത്.
പണം ലഭിച്ചതായി മൊബൈലില്‍ മെസേജ് വന്നെങ്കിലും ഇത് എവിടെ നിന്നാണ് വന്നതെന്ന് അറിയില്ലെന്നും ആരാണ് തന്റെ അക്കൗണ്ടിലേക്ക് പണം അയച്ചതെന്ന് ബാങ്കില്‍ പരിശോധിക്കാതെ വാടകയും മറ്റ് ബില്ലുകളും അടയ്ക്കാന്‍ 52,000 ദിര്‍ഹം ചെലവഴിച്ചതായും പ്രവാസി യുവാവ് കോടതിയില്‍ പറഞ്ഞു.
‘എന്റെ ബാങ്ക് അക്കൗണ്ടില്‍ 570,000 ദിര്‍ഹം എത്തിയപ്പോള്‍ ഞാന്‍ അത്ഭുതപ്പെട്ടു. എന്റെ വാടക നല്‍കാനും ചെലവിനും ഈ പണം ഉപയോഗിച്ചു, ഒരു കമ്പനി എന്നോട് പണം തിരികെ നല്‍കാന്‍ ആവശ്യപ്പെട്ടു, പക്ഷേ പണം അവരുടേതാണോ എന്ന് ഉറപ്പില്ലാത്തതിനാല്‍ ഞാന്‍ നിരസിച്ചു. അവര്‍ എന്നോട് പലതവണ ഇക്കാര്യം ചോദിച്ചു ബന്ധപ്പെട്ടിരുന്നു’
എന്നുാണ് യുവാവ് പറഞ്ഞത്.
‘ഞങ്ങളുടെ ഒരു ജീവനക്കാരന്‍ ക്ലൈന്റായ മറ്റൊരു കമ്പനിയുടെ അക്കൗണ്ടിലേക്ക് ട്രാന്‍സ്ഫര്‍ ചെയ്ത 570,000 ദിര്‍ഹമാണ് അബദ്ധത്തില്‍ മറ്റൊരു അകൗണ്ടിലേക്ക് പോയത്. പണം ലഭിക്കാത്തതിനെ കുറിച്ച് ക്ലയന്റായ കമ്പനി പരാതിപ്പെട്ടതോടെയാണ് ഇക്കാര്യം ബോധ്യമായത്. വിശദാംശങ്ങള്‍ പരിശോധിക്കാതെ വിതരണക്കാരന്റെ അക്കൗണ്ടിന് സമാനമായ അക്കൗണ്ടിലേക്കാണ് ട്രാന്‍സ്ഫര്‍ ചെയ്തതെന്ന് ഞങ്ങള്‍ കണ്ടെത്തി. പണം തിരികെ നല്‍കാന്‍ ബാങ്ക് മുഖേന ആവശ്യപ്പെട്ടെങ്കിലും പണം ലഭിച്ചയാള്‍ അതിന് തയ്യാറായില്ല. പണം തിരികെ നല്‍കാന്‍ അദ്ദേഹം വിസമ്മതിച്ചതായി ബാങ്ക് ഞങ്ങളോട് പറഞ്ഞു.’
എന്ന് മെഡിക്കല്‍ ട്രേഡിങ് കമ്പനിയിലെ ഉദ്യോഗസ്ഥര്‍ പറഞ്ഞു.
തുടര്‍ന്ന് കമ്പനി അല്‍ റഫ പോലീസ് സ്റ്റേഷനില്‍ പരാതി നല്‍കുകയായിരുന്നു. പോലീസ് ഇടപെട്ട് ബാങ്ക് അക്കൗണ്ട് മരവിപ്പിച്ചെങ്കിലും പണം തിരികെ ലഭിച്ചില്ല. പ്രതി അക്കൗണ്ടില്‍ നിന്ന് പണം മറ്റെവിടേക്കെങ്കിലും മാറ്റിയെന്ന് വ്യക്തമായി. അനധികൃതമായി ലഭിച്ച പണം കൈവശപ്പെടുത്തിയതിന് ദുബായ് പബ്ലിക് പ്രോസിക്യൂഷന്‍ ഇയാള്‍ക്കെതിരെ കേസെടുത്തു.
തുടര്‍ന്ന് ആ വ്യക്തി കുറ്റം സമ്മതിക്കുകയും ക്ലെയിം തീര്‍പ്പാക്കാന്‍ കുറച്ചു സമയം ആവശ്യപ്പെടുകയും ചെയ്തു, പക്ഷേ അദ്ദേഹത്തിന്റെ അഭ്യര്‍ത്ഥന കോടതി നിരസിച്ചു. വിധിക്കെതിരെ ഇന്ത്യക്കാരനായ പ്രവാസി അപ്പീല്‍ നല്‍കിയിട്ടുണ്ട്. ഇതില്‍ കോടതി അടുത്തമാസം വാദം കേള്‍ക്കുമെന്നാണ് റിപ്പോര്‍ട്ട്.
Discussion about this post