വാഷിംഗ്ടണ്‍ : യുഎസിലെ വിസ്‌കോന്‍സിനില്‍ ക്രിസ്മസ് പരേഡിലേക്ക് കാര്‍ ഇടിച്ചു കയറി അഞ്ച് പേര്‍ മരിച്ചു. അപകടത്തില്‍ പരിക്കേറ്റ നാല്പതിലേറെ പേരെ ആശുപത്രിയില്‍ പ്രവേശിപ്പിച്ചു. മിലുവാകീയില്‍ ഞായറാഴ്ച വൈകിട്ടാണ് സംഭവം.
ക്രിസ്മസിന് മുന്നോടിയായി യുഎസില്‍ നടക്കുന്ന ചടങ്ങാണ് ക്രിസ്മസ് പരേഡ്. പരേഡില്‍ ഡാന്‍സ് ഗ്രൂപ്പുകളിലും ബാന്‍ഡുകളിലുമായി ജനപ്രതിനിധികളടക്കം നിരവധിയാളുകളുണ്ടായിരുന്നു. അമിതവേഗത്തിലെത്തിയ കാര്‍ പരേഡിലേക്ക് ഇടിച്ച് കയറുകയായിരുന്നുവെന്ന് പോലീസ് വ്യക്തമാക്കി. അപകടത്തിനിടയാക്കിയ എസ്‌യുവി കാറും ഡ്രൈവറെയും കസ്റ്റഡിയിലെടുത്തതായും അന്വേഷണം ആരംഭിച്ചതായും പോലീസ് അറിയിച്ചു.
പരിക്കേറ്റ് ആശുപത്രിയില്‍ പ്രവേശിപ്പിച്ചവരില്‍ കുട്ടികളും ഉണ്ട്. മരണസംഖ്യ ഇനിയും ഉയര്‍ന്നേക്കാമെന്നാണ് ലഭിക്കുന്ന വിവരം.