ബെയ്ജിങ് : പാകിസ്താന് അത്യാധുനിക യുദ്ധക്കപ്പല്‍ കൈമാറി ചൈന. ചൈന സ്‌റ്റേറ്റ് ഷിപ്പ് ബില്‍ഡിങ് കോര്‍പ്പറേഷന്‍ നിര്‍മിച്ച് കൈമാറിയ 054എ/പി ടൈപ്പ് പടക്കപ്പലിന് പിഎന്‍എസ് തുഗ്‌റില്‍ എന്നാണ് പാകിസ്താന് പേര് നല്‍കിയിരിക്കുന്നത്.
ചൈന ഇതുവരെ കയറ്റുമതി ചെയ്തിട്ടുള്ളതില്‍ വെച്ചേറ്റവും അത്യാധുനികമായ യുദ്ധക്കപ്പലാണിതെന്നാണ് റിപ്പോര്‍ട്ട്. ഇന്ത്യന്‍ മഹാസമുദ്രത്തിലാവും പാകിസ്താന് ഇത് വിന്യസിക്കുക. പാകിസ്താന്റെ നാവികശേഷി പതിന്മടങ്ങ് മെച്ചപ്പെടുത്തുന്ന നീക്കമാണ് ചൈന നടത്തിയിരിക്കുന്നതെന്ന് പ്രതിരോധ വിദഗ്ധര്‍ അഭിപ്രായപ്പെട്ടു.
തിങ്കളാഴ്ച ഷാങ്ഹായില്‍ നടന്ന ചടങ്ങിലാണ് കപ്പല്‍ കൈമാറിയത്. അത്യാധുനിക യുദ്ധസന്നാഹങ്ങളും സ്വയം പ്രതിരോധ സംവിധാനങ്ങളും കപ്പലിലുണ്ടെന്ന് പാക് നാവികസേന അറിയിച്ചു.
ഭാവിയില്‍ മൂന്ന് യുദ്ധക്കപ്പലുകള്‍ കൂടി ചൈന പാകിസ്താന് കൈമാറും. ഇന്ത്യയുടെ അയല്‍ രാജ്യങ്ങളുമായി സൈനികബന്ധം വര്‍ധിപ്പിക്കുന്നതിലൂടെ രാജ്യത്തിന്റെ സമീപപ്രദേശങ്ങളില്‍ തങ്ങളുടെ നാവികസാന്നിധ്യം അറിയിക്കുക എന്നതാണ് ചൈനയുടെ ഉദ്ദേശമെന്നാണ് വിദ്ഗധാഭിപ്രായം.
Discussion about this post