ബമാക്കോ: ഭീകരവാദത്തിന് എതിരെ പോരാട്ടങ്ങൾ കടുപ്പിക്കുമെന്ന വാഗ്ദാനം നിറവേറ്റി ഫ്രഞ്ച് സർക്കാർ. മാലിയിൽ ഫ്രാൻസ് നേതൃത്വത്തിലെ സേന വ്യോമാക്രമണം നടത്തി 50 അൽ ഖായിദ ഭീകരരെ വധിച്ചു. ബുർക്കിന ഫാസോ, നൈഗർ അതിർത്തിയിൽ വെള്ളിയാഴ്ചയാണ് ആക്രമണം നടത്തിയതെന്നു ഫ്രഞ്ച് സർക്കാർ ഒദ്യോഗികമായി അറിയിച്ചു. രണ്ട് മിറാഷ് ജെറ്റുകളും ഒരു ഡ്രോണുമാണ് മിസൈൽ ആക്രമണത്തിന് എത്തിയത്. അൽ ഖായിദയുമായി ബന്ധപ്പെട്ട അൻസാറുൽ ഇസ്ലാം ഗ്രൂപ്പിലെ ഭീകരരെയാണു വധിച്ചത്.
മേഖലയിൽ ഭീകരപ്രവർത്തനം അടിച്ചമർത്താനുളള തീവ്രശ്രമത്തിലാണെന്ന് ഫ്രഞ്ച് പ്രതിരോധമന്ത്രി ഫ്ളോറൻസ് പാർലെ ഭീകരരെ വധിച്ച കാര്യം സ്ഥിരീകരിച്ചുകൊണ്ട് പ്രതികരിച്ചു. മാലിയിലെ ഭീകരരുടെ കേന്ദ്രത്തിന് നേരെ ഫ്രാൻസിന്റെ നേതൃത്വത്തിലുള്ള ബാർഖാനെ ഫോഴ്സാണ് ആക്രമണം നടത്തിയത്. വൻതോതിൽ ആയുധങ്ങളും പിടിച്ചെടുത്തിട്ടുണ്ട്. നാല് ഭീകരരെ പിടികൂടുകയും ചെയ്തു.
അതിർത്തി മേഖലയിൽ നിരവധി മോട്ടോർബൈക്കുകളിൽ ഭീകരർ ആക്രമണത്തിനു സജ്ജരാകുന്നുവെന്നു ഡ്രോൺ നിരീക്ഷണത്തിൽ വ്യക്തമായതിനു പിന്നാലെയാണ് ആക്രമണം നടത്തിയതെന്നു പ്രതിരോധമന്ത്രി പറഞ്ഞു.
ഫ്രാൻസിൽ അടുത്തിടെ നടന്ന ഭീകരാക്രമണങ്ങളിൽ നിരവധി പേർ മരിച്ചിരുന്നു. ഇതോടെയാണ് ഭീകരകേന്ദ്രങ്ങൾക്കു നേരെ ഫ്രഞ്ച് വ്യോമസേന കടുത്ത ആക്രമണം നടത്തിയത്. തെക്കൻ ഫ്രാൻസിലെ നീസ് പട്ടണത്തിലെ ഒരു പള്ളിക്കു സമീപം കഴിഞ്ഞ ദിവസം ഒരു സ്ത്രീയെ കഴുത്തറുത്തു കൊന്ന സംഭവവും ഭീകരാക്രമണമായിരുന്നു.
Discussion about this post