സ്‌റ്റോക്ക് ഹോം: സാഹിത്യത്തിനുള്ള 2020ലെ നോബേൽ പുരസ്‌കാരം പ്രശസ്ത അമേരിക്കൻ കവയിത്രി ലൂയിസ് ഗ്ലക്കിന്. ‘വ്യക്തിയുടെ അസ്തിത്വത്തെ സാർവ്വലൗകികമാക്കുന്ന തീക്ഷ്ണ സൗന്ദര്യമാർന്ന, സ്പഷ്ടമായ കാവ്യാത്മക ശബ്ദത്തിന്’- ആണ് ലൂയിസ് ഗ്ലക്കിന് പുരസ്‌കാരം നൽകുന്നതെന്ന് സ്വീഡിഷ് അക്കാഡമി വ്യക്തമാക്കി. പുലിസ്റ്റർ പ്രൈസ്(1993), നാഷണൽ ബുക്ക് അവാർഡ് (2014) തുടങ്ങി നിരവധി അന്താരാഷ്ട്ര പുരസ്‌കാരങ്ങളും ലൂയിസ് ഗ്ലക്കിന് ലഭിച്ചിട്ടുണ്ട്.
ദി ട്രയംഫ് ഓഫ് അകിലസ്, ദി വൈൽഡ് ഐറിസ് തുടങ്ങിയവ ഗ്ലക്കിന്റെ പ്രധാന കൃതികളാണ്. 1943ൽ ന്യൂയോർക്കിൽ ജനിച്ച ലൂയിസ് ഗ്ലക്ക് നിലവിൽ കേംബ്രിഡ്ജിലാണ് താമസിക്കുന്നത്. യേൽ യൂണിവേഴ്‌സിറ്റിയിൽ ഇംഗ്ലീഷ് അധ്യാപികയാണ്. 1968ൽ പുറത്തിറങ്ങിയ ഫസ്റ്റ്‌ബോൺ ആണ് ആദ്യകൃതി.
വ്യക്തിഗതാനുഭവങ്ങളിൽനിന്നുള്ള കവിതകളാണ് ലൂയിസ് ഗ്ലക്കിന്റേതെന്ന് വിലയിരുത്തപ്പെടുന്നു. മാനസിക സംഘർഷങ്ങളും ആസക്തിയും ഒറ്റപ്പെടലും പ്രകൃതിയനുഭവങ്ങളും ചേർന്നതാണ് അവരുടെ കാവ്യലോകമെന്നും നിരൂപകർ വിലയിരുത്തിയിരുത്തുന്നു.