ന്യൂയോര്ക്ക്: ലോകത്താകമാനം ഭീതി പരത്തി കൊറോണ വൈറസ് കവര്ന്നെടുത്തത് ഒരു ലക്ഷത്തി എണ്പത്തിയൊന്നായിരത്തിലധികം ആളുകളുടെ ജീവനുകള്. കഴിഞ്ഞ ദിവസം രാത്രി 12 മണിവരെ ലോകത്താകമാനം 181569 മരണങ്ങളാണ് റിപ്പോര്ട്ട് ചെയ്തിരിക്കുന്നത്. ഇരുപത്താറ് ലക്ഷത്തിലധികം പേര്ക്ക് ഇതിനോടകം കൊറോണ വൈറസ് ബാധ സ്ഥിരീകരിച്ചു.
രോഗികളുടെ എണ്ണവും മരണസംഖ്യയും കുതിച്ചുയരുന്ന അമേരിക്കയില് കഴിഞ്ഞ ദിവസം മാത്രം കൊറോണ ബാധിച്ച് മരിച്ചത് എണ്ണൂറിലധികം പേരാണ്. 831 മരണങ്ങളാണ് റിപ്പോര്ട്ട് ചെയ്തിട്ടുള്ളത്. അമേരിക്കയിലെ മൊത്തം മരണസംഖ്യ നാല്പ്പത്താറായിരം പിന്നിട്ടിട്ടുണ്ടെന്നാണ് റിപ്പോര്ട്ടുകള് വ്യക്തമാക്കുന്നത്.
പതിനായിരത്തോളം പുതിയ കേസുകള് റിപ്പോര്ട്ട് ചെയ്തിട്ടുണ്ടെന്നും കണക്കുകള് വ്യക്തമാക്കുന്നു. ഇവിടുത്തെ മൊത്തം രോഗബാധിതരുടെ എണ്ണം എട്ടേകാല് ലക്ഷം പിന്നിട്ടു. അതേസമയം, യുകെയിലും സ്ഥിതി ഗുരുതരമാവുകയാണ്. കഴിഞ്ഞ ദിവസം വരെ 763 മരണങ്ങളാണ് റിപ്പോര്ട്ട് ചെയ്തിരിക്കുന്നത്.
മൊത്തം മരണസംഖ്യ പതിനെണ്ണായിരം കടക്കുകയും ചെയ്തു. നാലായിരത്തിലേറെ പേര്ക്ക് ഇവിടെ പുതുതായി രോഗം സ്ഥിരികരിച്ചിട്ടുണ്ട്. മൊത്തം രോഗികളുടെ എണ്ണമാകട്ടെ 133495 ആയിട്ടുണ്ട്. ഇറ്റലിയില് കഴിഞ്ഞ ദിവസം 437 മരണങ്ങളാണ് റിപ്പോര്ട്ട് ചെയ്തിരിക്കുന്നത്. ആകെ 25085 പേരാണ് കൊറോണ ബാധിച്ച് മരിച്ചത്.
സ്പെയിന്, ഫ്രാന്സ്, ബെല്ജിയം എന്നിവിടങ്ങളിലും കനത്ത ആശങ്കയാണ് കൊറോണ വിതയ്ക്കുന്നത്. സ്പെയിനില് 435 മരണങ്ങളാണ് 24 മണിക്കൂറില് റിപ്പോര്ട്ട് ചെയ്തത്. ഇവിടുത്തെ മൊത്തം മരണസംഖ്യ 21717 ആയിട്ടുണ്ട്.ഫ്രാന്സില് മൊത്തം മരണസംഖ്യ 20796 ആയിട്ടുണ്ട്.
ബെല്ജിയത്തിലാകട്ടെ 264 മരണങ്ങളാണ് കഴിഞ്ഞദിവസം റിപ്പോര്ട്ട് ചെയ്തത്. ഇവിടുത്തെ മൊത്തം മരണസംഖ്യ ആറായിരത്തി മുന്നൂറോളമായിട്ടുണ്ട്. തുര്ക്കി, കാനഡ, നെതര്ലാന്ഡ്സ്, സ്വീഡന് എന്നിവിടങ്ങളിലും ഇന്ന് മാത്രം നൂറിലേറെ മരണങ്ങള് റിപ്പോര്ട്ട് ചെയ്തു. അതേസമയം, ലോകത്താകമാനമായി ഏഴ് ലക്ഷത്തിലധികം പേര്ക്ക് ഇതുവരെ രോഗം ഭേദമായിട്ടുണ്ട്.
Discussion about this post