കോഴിക്കോട്: മോഷണശ്രമത്തിനിടെ കിണറ്റില്‍ കുടുങ്ങിയ പ്രതിയെ പോലീസ് പിടികൂടി. രാമനാട്ടുകരയ്ക്കടുത്ത് പാറമ്മല്‍ അഴിഞ്ഞിലം മുള്ളന്‍പറമ്പത്ത് സുജിത്ത് (22) ആണ് അറസ്റ്റിലായത്. പമ്പ് സെറ്റ് മോഷ്ടിക്കാനിറങ്ങവെ കിണറ്റില്‍ വീണ പ്രതിയെ രക്ഷിക്കാന്‍ സുഹൃത്തുക്കള്‍ ആംബുലന്‍സുമായി എത്തിയത് നാട്ടുകാര്‍ അറിഞ്ഞതോടെയാണ് ഇയാള്‍ പിടിയിലായത്.
സുജിത്തിനൊപ്പമുണ്ടായിരുന്ന ചേലേമ്പ്ര സ്വദേശി ഷാജിക്കായി പോലീസ് അന്വേഷണം ഊര്‍ജിതമാക്കിയിട്ടുണ്ട്. കഴിഞ്ഞ ദിവസം തേഞ്ഞിപ്പാലം കോമരപ്പടിയിലെ പറമ്പിലെ കിണറ്റില്‍ പമ്പുസെറ്റ് മോഷ്ടിക്കാനായി ഇറങ്ങിയതായിരുന്നു സുജിത്ത്. പൈപ്പ് മുറിച്ച് തിരികെ കയറവേ കിണറ്റില്‍ വീഴുകയായിരുന്നു. പോക്കറ്റിലുള്ള മൊബൈല്‍ ഫോണ്‍ ഉപയോഗിച്ച് ഇതിനിടെ ഇയാള്‍ സുഹൃത്തുക്കളെ വിളിച്ചു.
ആംബുലന്‍സുമായാണ് സുഹൃത്തുക്കള്‍ ഇയാളെ രക്ഷിക്കാനായി എത്തിയത്. എന്നാല്‍ വഴിയറിയാത്തതിനാല്‍ ആംബുലന്‍സ് ഡ്രൈവര്‍ നാട്ടുകാരോട് അപകട സ്ഥലം അന്വേഷിച്ചു. ഇതോടെ നാട്ടുകാരും ഇവര്‍ക്കൊപ്പം രക്ഷാപ്രവര്‍ത്തനത്തില്‍ ചേര്‍ന്നു. അവശനിലയിലായിരുന്ന സുജിത്തിനെ കിണറ്റില്‍ നിന്നു പുറത്തെടുത്തപ്പോഴാണ് സംഗതി മോഷണ ശ്രമമാണെന്നു നാട്ടുകാര്‍ക്ക് മനസ്സിലായത്.
എന്നാല്‍ ആദ്യം ഇയാള്‍ അത് സമ്മതിച്ചില്ല. സുഹൃത്തിനൊപ്പം മദ്യപിക്കുമ്പോള്‍ വാക്കേറ്റമുണ്ടായെന്നും സുഹൃത്ത് തന്നെ തള്ളി കിണറ്റിലിട്ട് കടന്നുകളഞ്ഞെന്നുമാണ് പ്രതി പറഞ്ഞത്. എന്നാല്‍ പിന്നീട് സത്യാവസ്ഥ പോലീസിന് മനസ്സിലായി എന്നറിഞ്ഞതോടെ കൂട്ടുപ്രതി ഷാജിയെക്കൂടി പിടിക്കണമെന്നായി ആവശ്യം. 20,000 രൂപ വില മതിക്കുന്ന മോട്ടോര്‍ മോഷ്ടിക്കാനായിരുന്നു ഇരുവരുടെയും നീക്കമെന്ന് പോലീസ് പറഞ്ഞു.