ആലപ്പുഴ: വീടിന്റെ മുന്‍വാതില്‍ കുത്തിത്തുറന്ന് 60 പവന്‍ കവര്‍ന്നു. ആലപ്പുഴയിലെ ഉപ്പുകണ്ടം പൂമംഗലത്ത് സദാനന്ദന്റെ വീട്ടിലാണ് മോഷ്ടാക്കള്‍ ഇന്നലെ വന്‍ കവര്‍ച്ച നടത്തിയത്. വീട്ടുകാര്‍ സ്ഥലത്തില്ലാത്ത സമയത്തായിരുന്നു മോഷണം. സംഭവത്തില്‍ പോലീസ് അന്വേഷണം ആരംഭിച്ചു.
ആലപ്പുഴയിലെ വള്ളിക്കുന്നത്ത് വീട്ടിലാണ് കവര്‍ച്ച നടന്നത്. സദാനന്ദന്റെ അടുത്ത ബന്ധുവിന്റെ മരണത്തെതുടര്‍ന്ന് വീട്ടുകാര്‍ പോയപ്പോഴായിരുന്നു സംഭവം. വീടിന്റെ മുന്‍വാതില്‍ കുത്തിത്തുറന്ന് അകത്ത് കയറിയ കള്ളന്‍ രണ്ട് മുറികളിലെ അലമാരകളിലായി സൂക്ഷിച്ച സ്വര്‍ണം മോഷ്ടിച്ചു.
വീട്ടുകാര്‍ തിരിച്ചെത്തിയപ്പോള്‍ മുന്‍വാതിലുകള്‍ തുറന്നത് കണ്ട് പരിശോധിച്ചപ്പോഴാണ് മോഷണം നടന്നതായി അറിഞ്ഞത്. തുടര്‍ന്ന് വിവരം പോലീസിനെ അറിയിക്കുകയായിരുന്നു. സംഭവത്തില്‍ കേസെടുത്ത് അന്വേഷണം ആരംഭിച്ചിട്ടുണ്ട്. അടുത്തുള്ള സിസിടിവി ദൃശ്യങ്ങള്‍ പരിശോധിക്കുമെന്നും പോലീസ് അറിയിച്ചു.