തൃശ്ശൂര്‍: പതിനേഴാം ലോക്‌സഭാ തെരഞ്ഞെടുപ്പ് ഫലം പുറത്തു വന്നപ്പോള്‍ കേരളത്തില്‍ ഇരുപത് മണ്ഡലങ്ങളില്‍ പത്തൊമ്പതിലും വിജയക്കൊടി പാറിച്ചിരിക്കുന്നത് യുഡിഎഫ് ആണ്. എല്‍ഡിഎഫിന് ആകെ ലഭിച്ചത് ആലപ്പുഴയിലെ മണ്ഡലം മാത്രമാണ്. ഈ സാഹചര്യത്തിലാണ് കേരളത്തിലെ ഇടതുപക്ഷത്തിന് പിന്തുണയുമായി സംവിധായകന്‍ ആഷിക്ക് അബു രംഗത്തെത്തിയിരിക്കുന്നത്. നിലപാടുള്ള മുഖ്യമന്ത്രിക്കൊപ്പമാണെന്നും കൂടുതല്‍ കരുത്തോടെ എല്‍ഡിഎഫ് തിരിച്ചു വരണമെന്നും ആഷിക്ക് ഫേസ്ബുക്കില്‍ കുറിച്ചു.
ഇതിനു പുറമെ എറണാകുളത്ത് വന്‍ ഭൂരിപക്ഷത്തില്‍ വിജയിച്ച ഹൈബി ഈഡനെയും ആലത്തൂരില്‍ വിജയിച്ച രമ്യാ ഹരിദാസിനെയും ആഷിക്ക് അബു അഭിനന്ദിച്ചു.
ആഷിക്ക് അബുവിന്റെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം,
തോറ്റവര്‍ക്കൊപ്പം.ഇനിയും പൊരുതിനേടുമെന്ന് ആവര്‍ത്തിക്കുന്ന ഇടതുകേരളത്തിനൊപ്പം.നിലപാടുള്ള മുഖ്യമന്ത്രിക്കൊപ്പം. കൂടുതല്‍ കരുത്തോടെ തിരിച്ചുവരണം. എന്റെ മണ്ഡലത്തില്‍ അതിശയിപ്പിക്കുന്ന ഭൂരിപക്ഷത്തില്‍ വിജയിച്ച ശ്രീ ഹൈബിക്ക് അഭിനന്ദനങ്ങള്‍. സഖാവ് ആരിഫിനും മികച്ച പ്രകടനം കാഴ്ചവെച്ച എല്ലാ യുഡിഎഫ് വിജയികള്‍ക്കും വിശിഷ്യാ രമ്യ ഹരിദാസിനും അഭിനന്ദനങ്ങള്‍ .
ലാല്‍ സലാം
