ആലപ്പുഴ: നൂറനാട് കുടശ്ശനാട് എന്‍എസ്എസ് ഹൈസ്‌കൂളിന് മുന്നിലെ കൊടിമരത്തിലും എന്‍എസ്എസ് കരയോഗത്തിന് മുന്നിലും അജ്ഞാതര്‍ കരിങ്കൊടിയും റീത്തും പതിച്ചു. റീത്തില്‍ എന്‍എസ്എസ് ജനറല്‍ സെക്രട്ടറി ജി സുകുമാരന്‍നായര്‍ക്ക് ആദരാഞ്ജലികള്‍ എന്നാണ് രേഖപ്പെടുത്തിയിട്ടുള്ളത്. ഇത് സംബന്ധിച്ച് എന്‍എസ്എസ് പ്രാദേശിക നേതൃത്വം പോലീസില്‍ പരാതി നല്‍കിയിട്ടുണ്ട്.
സമാനമായ രീതിയില്‍ നേരത്തെ കോട്ടയത്തും തിരുവനന്തപുരത്തും എന്‍എസ്എസ് കരയോഗ ഓഫീസുകള്‍ക്ക് നേരെ ആക്രമണം ഉണ്ടായിരുന്നു. ആ സമയത്ത് തന്നെ ശബരിമല വിഷയത്തില്‍ തങ്ങള്‍ക്ക് നേരെ നടക്കുന്ന ആക്രമണമാണെന്നും ഇതിന് പിന്നില്‍ ആരാണെന്ന് അറിയാമെന്നും എന്‍എസ്എസ് നേതൃത്വം വ്യക്തമാക്കിയിരുന്നു. ഇതിന് പിന്നാലെയാണ് സമാനമായ ആക്രമണം ആലപ്പുഴയിലും ഉണ്ടായത്.
കുടശ്ശനാട് എന്‍എസ്എസിന്റെ നേതൃത്വത്തില്‍ സംഭവത്തിനെതിരെ പ്രതിഷേധ യോഗം ചേരും. സാമൂഹിക വിരുദ്ധരാണ് ഇതിന് പിന്നിലെന്നാണ് പോലീസ് പറയുന്നത്. സമീപത്തെ സിസിടിവി ദൃശ്യങ്ങള്‍ ഉള്‍പ്പടെ പോലീസ് പരിശോധിക്കുന്നുണ്ട്..
Discussion about this post