പത്തനംതിട്ട: കേരളത്തിലെ എക്‌സിറ്റ് പോള്‍ പ്രവചനങ്ങളെ തള്ളി പത്തനംതിട്ട ബിജെപി സ്ഥാനാര്‍ത്ഥി കെ സുരേന്ദ്രന്‍. പത്തംതിട്ടയില്‍ യുഡിഎഫ് വിജയിക്കുമെന്ന എക്‌സിറ്റ് പോളുകള്‍ ചിലരുടെ ആഗ്രഹം മാത്രമാണ്. പത്തനംതിട്ടയില്‍ ബിജെപിക്ക് വലിയ ജയം ഉണ്ടാകും. എക്‌സിറ്റ് പോളുകള്‍ കാണാത്ത അടിയൊഴുക്കുകള്‍ ഉണ്ടായിട്ടുണ്ടെന്നും സുരേന്ദ്രന്‍ വ്യക്തമാക്കി. കേരളത്തില്‍ യുഡിഎഫ് വലിയ നേട്ടം കൊയ്യുമെന്നും പത്തനംതിട്ടയില്‍ യുഡിഎഫ് ജയിക്കുമെന്നും എക്‌സിറ്റ് പോളുകള്‍ പുറത്ത് വന്നതിന് പിന്നാലെയാണ് പ്രവചനങ്ങളെ തള്ളി സുരേന്ദ്രന്‍ രംഗത്ത് വന്നത്.
ശബരിമല യുവതീ പ്രവേശനം ഏറെ ചര്‍ച്ചയായ പത്തനംതിട്ട ബിജെപിക്ക് വിജയപ്രതീക്ഷയുള്ള മണ്ഡലങ്ങളിലൊന്നാണ്. എന്നാല്‍ യുഡിഎഫിന്റെ ആന്‍ോ ആന്റണിക്കാകും വിജയ സാധ്യതയെന്നാണ് പുറത്ത് വന്ന അരഡസനോളം പ്രവചനങ്ങള്‍ പറയുന്നത്. ഈ അവസരത്തിലാണ് പ്രവചനങ്ങളെ തള്ളി സുരേന്ദ്രന്‍ രംഗത്ത് എത്തിയത്.
യുഡിഎഫിന്റെ ആന്‍ോ ആന്റണി 34 ശതമാനം വോട്ട് നേടി വിജയിക്കുമെന്നും, എന്‍ഡിഎ സ്ഥാനാര്‍ത്ഥി കെ സുരേന്ദ്രന്‍ 31 ശതമാനം വോട്ടുകള്‍ നേടുമെന്നും എല്‍ഡിഎഫിന്റെ സ്ഥാനാര്‍ത്ഥി വീണാ ജോര്‍ജ് 29 ശതമാനം വോട്ടുകളുമായി മൂന്നാം സ്ഥാനത്തേക്ക് പിന്തള്ളപ്പെടുമെന്നുമാണ് മാതൃഭൂമി ന്യൂസും ജിയോ വൈഡ് ഇന്ത്യയും ചേര്‍ന്ന് നടത്തിയ സര്‍വേ പ്രവചിക്കുന്നത്.
Discussion about this post