തൃശ്ശൂര്‍:കേരളത്തില്‍ തെരഞ്ഞെടുപ്പ് നടന്നതിന്റെ തൊട്ട് പിന്നാലെയാണ് കള്ളവോട്ട് നടന്നു എന്ന വാര്‍ത്തകള്‍ പുറത്തുവന്നത്. കാസര്‍കോടും കണ്ണൂരും കള്ളവോട്ട് നടന്നു എന്നാണ് പുറത്തു വന്നിരിക്കുന്ന വാര്‍ത്തകള്‍.
ഇതിന്റെ പശ്ചാത്തലത്തിലാണ് ‘നമ്മുടെ കാലത്തിലെ ദൈവം’ എന്ന തലക്കെട്ടോടെ സിസിടിവി ക്യാമറയുടെ ചിത്രം സോഷ്യല്‍ മീഡിയയില്‍ പങ്കുവെച്ച് രംഗത്തെത്തിയിരിക്കുകയാണ് സംവിധായകനും നടനുമായ ജോയ് മാത്യു. ജനാധിപത്യത്തെ നിരീക്ഷിക്കുകയും സംരക്ഷിക്കുകയും എടുത്തു കാട്ടുകയും ചെയ്യുന്ന ഈ കാലഘട്ടത്തിലെ ദൈവം എന്നാണ് സിസിടിവിയെ കുറിച്ച് ഫേസ്ബുക്കില്‍ ജോയ്മാത്യു കുറിച്ചത്.
കണ്ണൂരിലെയും കാസര്‍കോടിലേയും ഒരു മണ്ഡലത്തില്‍ നടന്ന കള്ളവോട്ടിന്റെ സിസിടിവി ദൃശ്യങ്ങള്‍ വിവാദമായ സാഹചര്യത്തിലാണ് ജോയ് മാത്യു ഇത്തരത്തിലുള്ള ഒരു പോസ്റ്റ് ഇട്ടിരിക്കുന്നത്. നേരത്തേ കള്ളവോട്ട് വിഷയത്തില്‍ കള്ളന്‍മാരായ നമ്മള്‍ കള്ളവോട്ട് ചെയ്യുന്നതില്‍ എന്തത്ഭുതം എന്ന കുറിപ്പോടെ ജോയ് മാത്യു ഒരു പോസ്റ്റ് ഫേസ്ബുക്കില്‍ ഇട്ടിരുന്നു. ഇത് ഏറെ വിമര്‍ശനങ്ങള്‍ക്ക് ഇടയാക്കിയിരുന്നു. ഇതിന് പിന്നാലെ ആണ് പുതിയ പോസ്റ്റുമായി ജോയ് മാത്യു വീണ്ടും രംഗത്തെത്തിയിരിക്കുന്നത്.