ബംഗളൂരു: ലോക്‌സഭാ തെരഞ്ഞെടുപ്പില്‍ ഇഞ്ചോടിഞ്ച് പോരാട്ടത്തില്‍ ആവേശം കൊഴുപ്പിക്കുകയാണ് പല പാര്‍ട്ടികളും. യുഡിഎഫ് കുത്തക എന്ന് അവകാശപ്പെടുന്ന മലപ്പുറമാണ് ഇന്ന് ഏറെ ചൂടുപിടിക്കുന്നത്. യുവജനങ്ങള്‍ക്കിടയില്‍ ആവേശകരമായി മുന്നേറുകയാണ് എല്‍ഡിഎഫ് സ്ഥാനാര്‍ത്ഥി വിപി സാനു. ഭൂരിപക്ഷത്തിന്റെയും അഭിപ്രായം ലീഗ് കോട്ട തകര്‍ത്ത് ചെങ്കൊടി പാറുമെന്ന് തന്നെയാണ്. ഇപ്പോള്‍ വിപി സാനുവിന് വോട്ടഭ്യര്‍ത്ഥിച്ച് നടന്‍ പ്രകാശ് രാജും രംഗത്ത് വന്നിരിക്കുകയാണ്.
സമൂഹമാധ്യമങ്ങളില്‍ പങ്കുവച്ച വീഡിയോയിലാണ് താരവും ബംഗളൂരു സെന്‍ട്രല്‍ മണ്ഡലത്തിലെ സ്വതന്ത്ര സ്ഥാനാര്‍ത്ഥിയുമായ പ്രകാശ് രാജ് സാനുവിനായി വോട്ടുചോദിച്ചത്. മത്സര രംഗത്തുള്ള ചില സ്ഥാനാര്‍ത്ഥികളെ തനിക്ക് പിന്തുണയ്ക്കേണ്ടതുണ്ടെന്നും അക്കൂട്ടത്തില്‍ ഒരാളാണ് വിദ്യാര്‍ത്ഥി നേതാവായി വളര്‍ന്നുവന്ന വിപി സാനുവെന്നും പ്രകാശ് രാജ് പറയുന്നു. ശരിയായ സ്ഥാനാര്‍ത്ഥിയെ തെരഞ്ഞെടുക്കുമ്പോഴാണ് നമ്മള്‍ വിജയിക്കുന്നത്.
നമ്മുടെ രാജ്യം ഇപ്പോള്‍ ആവശ്യപ്പെടുന്നതും ശക്തവും സത്യസന്ധവുമായ യുവശബ്ദങ്ങളെയാണെന്നും അദ്ദേഹം കൂട്ടിച്ചേര്‍ത്തു. സാനുവിന് എല്ലാ വിജയങ്ങളും ആശംസിക്കുന്നു. കേരളത്തിലെ ജനങ്ങള്‍ ശരിയായതിനെ തെരഞ്ഞെടുക്കുമെന്ന് ഉറപ്പുണ്ടെന്നും അദ്ദേഹം വിഡിയോയില്‍ പറയുന്നുണ്ട്. മുന്‍പ് ബിജെപിക്കെതിരെയും നരേന്ദ്ര മോഡിക്കെതിരെയും വന്‍വിമര്‍ശനങ്ങളുയര്‍ത്തി താരം രംഗത്തെത്തിയിരുന്നു.
