കൊല്ലം: മത്സ്യബന്ധനത്തിനു പോയ ഫൈബര്‍ വള്ളത്തില്‍ ബോട്ട് ഇടിച്ച് ഒരാള്‍ മരിച്ചു. രണ്ട് പേര്‍ക്ക് പരിക്ക്. പള്ളിത്തോട്ടം സ്വദേശി ബൈജുവാണ് മരിച്ചത്. ഫെഡറിക്, ഡാനിയല്‍ എന്നിവര്‍ക്കാണ് പരിക്കേറ്റത്. ബൈജുവിന്റെ മൃതദേഹം കൊല്ലം ജില്ലാ ആശുപത്രിയില്‍ സൂക്ഷിച്ചിരിക്കുകയാണ്. അതേസമയം ഏതു ബോട്ടാണ് വള്ളത്തില്‍ ഇടിച്ചതെന്ന് വ്യക്തമായിട്ടില്ല.
ബുധനാഴ്ച രാവിലെ ആറരയോടെയാണ് സംഭവം. വള്ളത്തില്‍ ഇടിച്ച ശേഷം ബോട്ട് നിര്‍ത്താതെ പോവുകയായിരുന്നു. സംഭവസമയത്ത് സ്ഥലത്തുണ്ടായിരുന്ന മറ്റൊരു വള്ളത്തിലെ ആളുകളാണ് പരിക്കേറ്റവരെ ആശുപത്രിയില്‍ എത്തിച്ചത്. എന്നാല്‍ ബൈജുവിനെ രക്ഷിക്കാനായില്ല. മറ്റു രണ്ടുപേര്‍ ജനറല്‍ ആശുപത്രിയില്‍ ചികിത്സയിലാണ്. ഇടിച്ച ബോട്ട് കണ്ടെത്താനുള്ള ശ്രമം തീരദേശ പോലീസ് ആരംഭിച്ചിട്ടുണ്ട്. പിരിക്കേറ്റവര്‍ക്ക് ഗുരുതരമല്ല.