കൊച്ചി: മണ്ഡലം മാറി വോട്ടു ചോദിച്ചതുമായി ബന്ധപ്പെട്ട സംഭവത്തില്‍ പ്രതികരണവുമായി കേന്ദ്രമന്ത്രിയും എറണാകുളത്തെ എന്‍ഡിഎ സ്ഥാനാര്‍ത്ഥിയുമായ അല്‍ഫോണ്‍സ് കണ്ണന്താനം. വിമാനത്താവളം വേറെ മണ്ഡലത്തില്‍ ആയത് എന്റെ കുഴപ്പമാണോയെന്ന് ഒരു പ്രമുഖമാധ്യമത്തിലെ റിപ്പോര്‍ട്ടറോട് അദ്ദേഹം ചോദിച്ചു.
അതോടൊപ്പം കൊച്ചി വിമാനത്താവളം ഇരിക്കുന്നത് വേറെ മണ്ഡലത്തിലാണെന്ന് ഇവിടുത്തെ സ്ഥാനാര്‍ത്ഥികള്‍ക്കൊന്നും അറിയില്ലേ എന്നും അല്‍ഫോണ്‍സ് കണ്ണന്താനം ചോദിച്ചു. താന്‍ വേറെ മണ്ഡലത്തിലാണ് ഇറങ്ങിയത്, കണ്ടവരോടൊക്കെ വോട്ട് ചെയ്യണമെന്ന് പറയുകയാണ് ചെയ്തതെന്നും തനിക്ക് വോട്ടു ചെയ്യണമെന്ന് പറഞ്ഞില്ലയെന്നും കണ്ണന്താനം വ്യക്തമാക്കി.
നെടുമ്പാശ്ശേരിയില്‍ നിന്ന് കെഎസ്ആര്‍ടിസി ബസില്‍ എറണാകുളത്തേക്ക് പോയ കണ്ണന്താനം ചാലക്കുടി മണ്ഡലത്തില്‍ ഉള്‍പ്പെടുന്ന ആലുവയില്‍ എത്തിയപ്പോള്‍ ബസില്‍ നിന്ന് ഇറങ്ങി. അവിടെ കണ്ടവരോടെല്ലാം വോട്ട് ചോദിച്ചു. ഈ സമയം കൂടെയുണ്ടായിരുന്ന പാര്‍ട്ടി പ്രവര്‍ത്തകരാണ് മണ്ഡലം മാറിയ കാര്യം അദ്ദേഹത്തെ അറിയിച്ചത്.