ആലപ്പുഴ: ആലപ്പുഴ റെയില്‍വേ സ്റ്റേഷനില്‍ കഞ്ചാവ് കണ്ടെത്തി. പുലര്‍ച്ചെ രണ്ടുമണിയോടെ സ്റ്റേഷനിലെ രണ്ടാമത്തെ പ്ലാറ്റ് ഫോമില്‍ ഉപേക്ഷിക്കപ്പെട്ട നിലയിലാണ് കഞ്ചാവ് കണ്ടെത്തിയത്. രണ്ട് ബാഗുകളിലായി 20 കിലോ കഞ്ചാവാണ് കണ്ടെത്തിയത്.
ആന്ധ്രയിലെ പത്രകടലാസില്‍ പൊതിഞ്ഞായിരുന്നു കഞ്ചാവ് സൂക്ഷിച്ചിരുന്നതിനാല്‍ കഞ്ചാവ് ആന്ധ്രപ്രദേശില്‍ നിന്ന് കൊണ്ടുവന്നതെന്നും ധന്‍ബാദ് എക്സ്പ്രസ്സിലാണ് കഞ്ചാവ് ആലപ്പുഴയില്‍ എത്തിച്ചതെന്നുമുള്ള നിഗമനത്തിലാണ് പോലീസ്.
ആന്ധ്രയില്‍ നിന്ന് ട്രയിനില്‍ കയറ്റിവിട്ട് ആലപ്പുഴയില്‍ നിന്ന് ശേഖരിക്കുന്ന സംഘമാകാം ഇതിന് പിന്നില്‍ എന്നാണ് പോലീസിന്റെ പ്രാഥമിക നിഗമനം. ഇതിന് മുന്‍പും ധന്‍ബാദ് എക്സപ്രസില്‍ നിന്നും കഞ്ചാവ് കണ്ടെത്തിയിട്ടുണ്ട്. പ്രതികള്‍ക്കായുള്ള അന്വേഷണം ആരംഭിച്ചു.