കോഴിക്കോട്: ജെഡിയുവിന് എല്‍ഡിഎഫ് സീറ്റ് നിഷേധിച്ചതില്‍ പരിഹാസവുമായി എത്തിയ പ്രതിപക്ഷ നേതാവ് രമേശ് ചെന്നിത്തലയ്ക്ക് വായടപ്പിക്കുന്ന മറുപടിയുമായി വീരേന്ദ്രകുമാര്‍. യുഡിഎഫ് സീറ്റ് തന്നു എന്നത് ശരിയാണെന്നും വന്‍ ഭൂരിപക്ഷത്തോടെ തോല്‍പ്പിച്ചത് മറക്കരുതെന്നും വീരേന്ദ്ര കുമാര്‍ പറഞ്ഞു. യുഡിഎഫ് രണ്ട് സീറ്റ് നല്‍കിയിരുന്നെന്നും വീരേന്ദ്ര കുമാറിനും സംഘത്തിനും ഇപ്പോള്‍ ഒന്നുമില്ലാത്ത അവസ്ഥയായെന്നുമായിരുന്നു ചെന്നിത്തലയുടെ പരാമര്‍ശം.
പാലക്കാട് മണ്ഡലത്തില്‍ വെറുതെ നിന്ന് തന്നാല്‍ മതിയെന്നാണ് യുഡിഎഫ് പറഞ്ഞത്. അതനുസരിച്ച് നിന്നു. ബാക്കിയെല്ലാം കോണ്‍ഗ്രസ് ചെയ്തതു തന്നു- ചെന്നിത്തലയ്ക്ക് മറുപടിയായി വിരേന്ദ്രകുമാര്‍ പറയുന്നു.
അതേസമയം, യുഡിഎഫ് വിട്ട് ഇടത് മുന്നണിക്കൊപ്പം പോയ വീരേന്ദ്ര കുമാറിനോട് സഹതാപമുണ്ടെന്നാണ് രമേശ് ചെന്നിത്തല പരിഹസിച്ചത്. ലോക്‌സഭാ തെരഞ്ഞെടുപ്പിനുള്ള സ്ഥാനാര്‍ത്ഥി ചര്‍ച്ച നടക്കുമ്പോള്‍ വീരേന്ദ്രകുമാറിനെ സീറ്റ് ചര്‍ച്ചക്ക് പോലും വിളിച്ചില്ല. ആ പാര്‍ട്ടിക്ക് ഇപ്പോഴെന്ത് കിട്ടിയെന്ന് പ്രവര്‍ത്തകര്‍ ചിന്തിക്കണമെന്നും രമേശ് ചെന്നിത്തല പറഞ്ഞിരുന്നു.
Discussion about this post