കടലുണ്ടി: ഫുട്‌ബോള്‍ ടൂര്‍ണമെന്റിനിടെ കോഴിക്കോട് കടലുണ്ടിയില്‍ താല്‍ക്കാലികമായി നിര്‍മ്മിച്ച ഫുട്‌ബോള്‍ ഗ്യാലറി തകര്‍ന്ന് വീണ് നിരവധി പേര്‍ക്ക് പരിക്ക്. മത്സരം നടക്കുന്നതിനിടെയാണ് അപകടമുണ്ടായത്.
ഇന്നലെ രാത്രി 9.30 ഓടെയായിരുന്നു അപകടം. ആയിരത്തോളം പേര്‍ ഇരുന്ന ഗ്യാലറി നിലം പൊത്തുകയായിരുന്നു. പരിക്കേറ്റവരെ കോഴിക്കോട് മെഡിക്കല്‍ കോളേജിലും സ്വകാര്യ ആശുപത്രിയിലും പ്രവേശിപ്പിച്ചു. അപകടത്തില്‍ 30ല്‍ അധികം ആളുകള്‍ക്ക് പരിക്കേറ്റതായാണ് റിപ്പോര്‍ട്ട്.
അനുവദനീയമായതില്‍ കൂടുതല്‍ ആളുകള്‍ കയറിയതാണ് അപകടകാരണമെന്നാണ് പ്രാഥമിക നിഗമനം. വെള്ളിയാഴ്ച രാത്രിയോടെ ഉണ്ടായ അപകടത്തില്‍ പരിക്കേറ്റവരെ സമീപത്തെ കോട്ടപറമ്പിലെ സ്വകാര്യ ആശുപത്രിയില്‍ പ്രവേശിപ്പിച്ചു. പരിക്കേറ്റവരില്‍ നാലുപേരെ കോഴിക്കോട് മെഡിക്കല്‍ കോളേജിലും പ്രവേശിപ്പിച്ചിരിക്കുകയാണ്.