കല്‍പ്പറ്റ: വയനാട് കല്‍പ്പറ്റയിലെ ടെക്സ്റ്റയില്‍സില്‍ വന്‍ തീപ്പിടിത്തം. നഗരത്തിലെ സിന്ദൂര്‍ ടെക്സ്‌റ്റൈല്‍സിലാണ് തീപ്പിടുത്തമുണ്ടായത്. നിലവില്‍ ആളപായമൊന്നും റിപ്പോര്‍ട്ട് ചെയ്തിട്ടില്ലെങ്കിലും കെട്ടിടത്തിനുള്ളില്‍ ആളുണ്ടോ എന്ന കാര്യം ഉറപ്പിക്കാനായിട്ടില്ല.
തീ ഇപ്പോഴും നിയന്ത്രണ വിധേയമായിട്ടില്ല. 5 യൂണിറ്റ് ഫയര്‍ഫോഴ്സ് തീയണക്കാനുള്ള ശ്രമം തുടരുകയാണ്. വൈകുന്നേരം എട്ട് മണിയോടെയാണ് കെട്ടിടത്തില്‍ തീ പടരുന്നത് ശ്രദ്ധയില്‍പ്പെട്ടത്.
കെട്ടിടത്തിന്റെ നാലാം നിലയിലാണ് തീപിടുത്തമുണ്ടായത്. പെട്ടെന്ന് തീ ആളിപ്പടരുകയായിരുന്നു. നിലവില്‍ നഗരത്തിലെ വൈദ്യുതി ബന്ധങ്ങളെല്ലാം വിച്ഛേദിച്ചിട്ടുണ്ട്. ഇതുവഴിയുള്ള ഗതാഗതം താത്കാലികമായി നിരോധിച്ചു.
