തളിപ്പറമ്പ്: സഹോദരന് വാട്‌സ്ആപ്പ് സന്ദേശമയച്ച ശേഷം നവവരന്‍ പുഴയില്‍ ചാടി. വിവാഹം കഴിഞ്ഞിട്ട് മൂന്നു മാസം തികയും മുന്‍പ് കുടുംബപ്രശ്‌നങ്ങള്‍ ഉടലെടുത്തിരുന്നു. ഇതിനു പിന്നാലെയാണ് ആത്മഹത്യാ സന്ദേശമയച്ച് പുഴയില്‍ ചാടിയത്. പുഴയില്‍ ചാടിയ ചൊറുക്കള സ്വദേശിയായ യുവാവിനെ കണ്ടെത്താന്‍ പോലീസും അഗ്‌നിശമന സേനയും തെരച്ചില്‍ തുടരുന്നു.
ചൊവ്വാഴ്ച രാത്രി ഒമ്പതരമണിയോടെയാണ് ചൊറുക്കള മഞ്ചാലിലെ കേളോത്ത് വളപ്പില്‍ കെവി സാബിര്‍ നണിശേരിക്കടവ് പുഴയില്‍ ചാടുന്നതായി സഹോദരന് സന്ദേശമയച്ചത്. ഉടന്‍ തന്നെ പോലീസില്‍ വിവരമറിയിച്ച് ബന്ധുക്കളും നാട്ടുകാരും നണിശേരിക്കടവ് പാലത്തിന് സമീപമെത്തിയപ്പോള്‍ പാലത്തിന് സമീപം സാബിറിന്റെ ബൈക്ക് ഉപേക്ഷിച്ച നിലയില്‍ കണ്ടെത്തി.
തുടര്‍ന്ന് ബുധനാഴ്ച പുലര്‍ച്ചെ ഒരുമണിവരെ പുഴയില്‍ തിരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞില്ല. ബുധനാഴ്ച രാവിലെ പോലീസും അഗ്‌നിശമന സേനയും വീണ്ടും തിരച്ചില്‍ ആരംഭിച്ചിട്ടുണ്ട്.
Discussion about this post