കോഴിക്കോട്; ജില്ലയിലെ ബീച്ച് ഗവ. ജനറല്‍ ആശുപത്രി രാജ്യത്തിന് മാതൃക. ട്രാന്‍സ്ജെന്‍ഡേഴ്സിനു മാത്രമായുള്ള ഒപി വിഭാഗം ഇന്നു ആശുപത്രിയില്‍ പ്രവര്‍ത്തനം ആരംഭിക്കും. 10ന് പ്രിന്‍സിപ്പല്‍ ജില്ലാ ജഡ്ജ് എംആര്‍ അനിത ഉദ്ഘാടനം ചെയ്യും.
എല്ലാ ബുധനാഴ്ചകളിലും നിലവിലെ ഒപി സമയത്തു തന്നെയാണു പ്രത്യേക ഒപിയും പ്രവര്‍ത്തിക്കുക. പിങ്ക് നിറത്തിലുള്ള പ്രത്യേക ഒപി കാര്‍ഡാണു ട്രാന്‍സ്ജെന്‍ഡേഴ്സിനു നല്‍കുന്നത്. ഇതിന് പ്രത്യേക ഫീസ് ഇല്ല. ട്രാന്‍സ്ജെന്‍ഡര്‍ ഒപിയിലേക്കു മാത്രമായി ഡോക്ടറെ നിയോഗിച്ചിട്ടുണ്ടെന്നും അധികൃതര്‍ വ്യക്തമാക്കി.
മാസങ്ങള്‍ക്കു മുമ്പ് ഉദ്ഘാടനത്തിനു തീയതി നിശ്ചയിച്ചിരുന്നെങ്കിലും മന്ത്രിയുടെ അസൗകര്യം മൂലം നടന്നില്ല. തുടര്‍ നടപടികള്‍ താമസിച്ചതിനെ തുടര്‍ന്ന് ലീഗല്‍ സര്‍വീസ് അതോറിറ്റിയുടെ ഇടപെടലിലാണ് ഒപി ആരംഭിക്കാന്‍ തീരുമാനമായത്. ആശുപത്രികളില്‍ ട്രാന്‍സ്ജെന്‍ഡേഴ്സ് അവഗണന നേരിടുന്നതായി പരാതി ശക്തമായതിനെ തുടര്‍ന്നാണു പദ്ധതി നടപ്പാക്കുന്നത്. ഇത് രാജ്യത്തിന് തന്നെ മാതൃകയാണെന്നും ആരോഗ്യവകുപ്പ് അധികൃതര്‍ അറിയിച്ചു.
Discussion about this post