കൊച്ചി: മലപ്പുറത്ത് പ്രസവത്തിനിടെ യുവതി മരിച്ച സംഭവത്തിൽ ദുരൂഹത. പെരുമ്പാവൂര് സ്വദേശിയായ അസ്മ അക്യുപംക്ചര് ചികിത്സയിലൂടെ പ്രസവമെടുക്കുമ്പോഴായിരുന്നോ മരണം എന്നതടക്കം പൊലീസ് അന്വേഷിക്കുമെന്നാണ് വിവരം.
മലപ്പുറം ചട്ടിപ്പറമ്പില് വീട്ടില് കുടുംബം ഒന്നര വര്ഷമായി താമസിക്കുന്നുണ്ടെങ്കിലും അയല്വാസികളുമായി സിറാജുദ്ദീനും അസ്മയ്ക്കും സൗഹൃദം ഉണ്ടായിരുന്നില്ലെന്ന് നാട്ടുകാര് പറയുന്നു.
സിറാജുദ്ദീന്റെ പേരും വീട്ടില് എത്ര കുട്ടികളുണ്ടെന്നതും ഇന്നലെ വാര്ത്ത വരുമ്പോഴാണു തൊട്ടടുത്ത അയല്വാസികള് പോലും അറിയുന്നത്.
അസ്മ കുട്ടികളെ സ്കൂളിലയയ്ക്കാന് മാത്രമാണു പുറത്തിറങ്ങുന്നതെന്ന് അയല്വാസികള് പറയുന്നു. കാസര്കോട്ട് മതാധ്യാപകനാണെന്നാണു സിറാജുദ്ദീന് താമസത്തിനു വന്ന സമയത്തു പറഞ്ഞിരുന്നത്.
‘മടവൂര് കാഫില’യെന്ന പേരില് 63,500 പേര് സബ്സ്ക്രൈബ് ചെയ്ത യുട്യൂബ് ചാനല് നടത്തിപ്പുകാരന് കൂടിയാണ് സിറാജുദ്ദീന്. ജനുവരിയില് ആശാവര്ക്കര് വീട്ടിലെത്തി, ഗര്ഭിണിയാണോയെന്ന് അസ്മയോട് അന്വേഷിച്ചിരുന്നു.
എന്നാൽ വീട്ടില്നിന്നു പുറത്തിറങ്ങാതെ, ജനലിലൂടെ അല്ലെന്നു മറുപടി നല്കി. എന്നാല്, കഴിഞ്ഞ ദിവസം അന്വേഷിച്ചപ്പോള് ഗര്ഭിണിയാണെന്നും 8 മാസമായെന്നും പറഞ്ഞിരുന്നുവെന്ന് അയൽവാസികൾ പറയുന്നു.
Discussion about this post