ന്യൂഡൽഹി: വഖഫ് നിയമ ഭേദഗതി ബിൽ രാജ്യസഭയിലും പാസായതോടെ മുനമ്പത്തും ആഹ്ലാദപ്രകടനം. വോട്ടെടുപ്പിൽ 128 പേരാണ് ബില്ലിനെ അനുകൂലിച്ചത്.
അതേസമയം, 95 പേർ എതിർത്തു. കഴിഞ്ഞ ദിവസം ബിൽ ലോക്സഭ പാസാക്കിയിരുന്നു. ഇതോടെ ബിൽ പാർലമെന്റ് കടന്നു. ഇനി രാഷ്ട്രപതിയുടെ അംഗീകാരത്തിനായി അയക്കും.
രാഷ്ട്രപതി ബില്ലിൽ ഒപ്പിട്ടാൽ നിയമമാകും. മണിക്കൂറുകൾ നീണ്ട ചർച്ചക്ക് ശേഷമായിരുന്നു വോട്ടെടുപ്പ്. ബിൽ പാസായതോടെ മുനമ്പത്ത് പടക്കം പൊട്ടിച്ചും പ്രകടനം നടത്തിയും സമരക്കാർ ആഹ്ലാദ പ്രകടനം നടത്തി.
കേന്ദ്ര സർക്കാരിനെയും സുരേഷ് ഗോപിയെയും പിന്തുണച്ചുകൊണ്ടായിരുന്നു ആഹ്ലാദപ്രകടനം. അതേസമയം, റവന്യു അവകാശങ്ങൾ പുനഃസ്ഥപിക്കുന്നത് വരെ സമരം തുടരുമെന്നും മുനമ്പം സമര സമിതി അറിയിച്ചു.
