തിരുവനന്തപുരം: വര്‍ക്കലയില്‍ സ്‌കൂളില്‍ അതിക്രമം നടത്തിയ 20 വയസുകാരന് പിടിയില്‍. തോണിപ്പാറ സ്വദേശി രഞ്ജിത്താണ് പിടിയിലായത്. പ്രതി ലഹരിക്ക് അടിമയാണെന്ന് പോലീസ് പറഞ്ഞു. വര്‍ക്കല ഹരിഹരപുരം സെന്റ് തോമസ് യു പി സ്‌കൂളിലാണ് സംഭവം നടന്നത്.
രണ്ട് യുവാക്കളോടൊപ്പം ബൈക്കില്‍ സ്‌കൂളിന്റെ മുന്‍വശത്ത് വന്നിറങ്ങുകയായിരുന്നു അക്രമി. സ്‌കൂള്‍ വിദ്യാര്‍ത്ഥികളുമായി പുറത്തേക്ക് പോകാന്‍ തയ്യാറായി നിന്ന കാറിന്റെ ചില്ലുകള്‍ അടിച്ച് തകര്‍ത്ത് പ്രതി കുട്ടികളെ ഭയപ്പെടുത്തുകയായിരുന്നു. ഇത് കണ്ട് സ്‌കൂള്‍ ഹെഡ്മാസ്റ്റര്‍ യുവാവിനെ താക്കീത് നല്‍കുകയും പുറത്തേക്ക് പോകാന്‍ ആവശ്യപ്പെടുകയും ചെയ്തു.
ഇതില്‍ പ്രകോപിതനായ യുവാവ് ഹെഡ്മാസ്റ്ററെ കുട്ടികളുടെ മുന്നില്‍ വച്ച് ക്രൂരമായി മര്‍ദ്ദിച്ചു. തുടര്‍ന്ന് സ്‌കൂളിലേക്ക് അതിക്രമിച്ച് കയറി ജനലുകളും വാതിലുകളിലും ശക്തിയായി അടിച്ചു ശബ്ദമുണ്ടാക്കുകയും ബഹളം വയ്ക്കുകയും ചെയ്തു. തുടര്‍ന്ന് അവിടെ നിന്നും രക്ഷപ്പെടാന്‍ ശ്രമിച്ച യുവാവിനെ നാട്ടുകാര്‍ പിന്തുടര്‍ന്നാണ് പിടികൂടിയത്. തുടര്‍ന്ന് അയിരൂര്‍ പോലീസിന് കൈമാറി.
Discussion about this post