തിരുവനന്തപുരം: വര്‍ഗ്ഗീയത പടര്‍ത്തുന്ന സോഷ്യല്‍മീഡിയ പോസ്റ്റ് പ്രചരിപ്പിച്ച രണ്ട് ബിജെപി പ്രവര്‍ത്തകരെ നൂറനാട് പോലീസ് അറസ്റ്റു ചെയ്തു. മുഖ്യമന്ത്രി പിണറായി വിജയന്റെ മരിക്കണമെന്ന് ഫേസ്ബുക്ക് പോസ്റ്റിട്ട കരസേനയില്‍ ജോലി ചെയ്യുന്ന കരിമുളയ്ക്കല്‍ വടക്ക് വല്ല്യയ്യത്ത് അംബുജാക്ഷന്‍ (47), പ്രവാസ ജീവിതം കഴിഞ്ഞ് നാട്ടിലെത്തിയ ചരുവയ്യത്ത് കിഴക്കതില്‍ അനില്‍ ( 38) എന്നിവരെയാണ് നൂറനാട് എസ്‌ഐ വി ബിജുവിന്റെ നേതൃത്വത്തിലുള്ള പോലീസ് അറസ്റ്റ് ചെയ്തത്.
മത വര്‍ഗീയതയുയര്‍ത്തി സോഷ്യല്‍ മീഡിയയില്‍ പ്രചരണം നടത്താറുള്ളയിവര്‍ കഴിഞ്ഞ ദിവസങ്ങളിലാണ് മുഖ്യമന്ത്രിയ്‌ക്കെതിരെ മോശമായ വിധത്തില്‍ പോസ്റ്റിട്ടത്. സിപിഎം ചാരുംമുട് ലോക്കല്‍ സെക്രട്ടറി ഒ സജികുമാറിന്റെ രേഖാമൂലമുള്ള പരാതിയിലാണ് കേസെടുത്തത്.
ഇത്തരം പോസ്റ്റുകള്‍ ഷെയര്‍ ചെയ്തിട്ടുള്ളവരേയും, സോഷ്യല്‍ മീഡിയ വഴി വര്‍ഗീയ പ്രചരണം നടത്തുന്നവരേയും നിരീക്ഷിച്ചു വരികയാണെന്ന് എസ്‌ഐ പറഞ്ഞു.