കോട്ടയം: ശബരിമല തീര്‍ത്ഥാടകരുടെ വാഹനം നിര്‍ത്തിയിട്ടിരുന്ന ലോറിക്ക് പിന്നിലേക്ക് ഇടിച്ചുകയറി. അപകടത്തില്‍ 5 പേര്‍ക്ക് പരിക്കേറ്റു. കോട്ടയം ജില്ലയിലെ കാഞ്ഞിരപ്പള്ളിയിലാണ് അപകടം.
ആന്ധ്രാസ്വദേശികള്‍ സഞ്ചരിച്ച കാറാണ് അപകടത്തില്‍പെട്ടത്. അപകടത്തില്‍ ആന്ധ്രയിലെ പ്രകാശം സ്വദേശികളായ മണികണ്ഠന്‍ (28), ആത്തേ ശ്രീനിവാസലു (45), ശ്രീമന്‍ നാരായണ (38) ഇദ്ദേഹത്തിന്റെ മകള്‍ ലക്ഷ്മി റിഷിത (10), ഡ്രൈവര്‍ ലക്ഷ്മി റെഡ്ഢി എന്നിവര്‍ക്കാണ് പരിക്കേറ്റത്.
ഇന്ന് ഉച്ചയോട് കൂടിയാണ് അപകടം ഉണ്ടായത്. അഞ്ചംഗ തീര്‍ത്ഥാടക സംഘം സഞ്ചരിച്ചിരുന്ന കാര്‍ കാഞ്ഞിരപ്പള്ളി ജംഗ്ഷന് സമീപം നിര്‍ത്തിയിട്ടിരുന്ന ലോറിക്ക് പിന്നിലേക്ക് ഇടിച്ചുകയറുകയായിരുന്നു.
നിയന്ത്രണം വിട്ട തീര്‍ത്ഥാടകരുടെ കാര്‍ ലോറിക്ക് പിന്നിലേക്ക് ഇടിച്ചു കയറുകയായിരുന്നു എന്ന് നാട്ടുകാരും സാക്ഷ്യപ്പെടുത്തുന്നു. നാട്ടുകാരും ഒപ്പം ഫയര്‍ഫോഴ്‌സും ചേര്‍ന്നാണ് കാറില്‍ നിന്നും ആളുകളെ പുറത്തിറക്കി ആശുപത്രിയിലെത്തിച്ചത്.
പരിക്കേറ്റ 5 പേരെയും താലൂക്ക് ആശുപത്രിയിലാണ് പ്രവേശിപ്പിച്ചിരിക്കുന്നത്. അതേസമയം, ഇവരുടെ പരിക്ക് ഗുരുതരമല്ല എന്നാണ് പുറത്തുവരുന്ന വിവരം.
Discussion about this post