കൊല്ലം: കൊട്ടാരക്കര പുത്തൂരില്‍ സ്വകാര്യ ബസ്സില്‍ നിന്നും തെറിച്ചു വീണ് വിദ്യാര്‍ഥിനിക്ക് പരിക്ക്. കൊട്ടാരക്കര മാര്‍ത്തോമാ ഗേള്‍സ് ഹൈസ്‌കൂളിലെ വിദ്യാര്‍ഥിനിക്കാണ് പരിക്കേറ്റത്. പരിക്കേറ്റ കുട്ടിയെ സ്വകാര്യ ആശുപത്രിയില്‍ പ്രവേശിപ്പിച്ചു.
സംഭവത്തില്‍ സ്വകാര്യ ബസും രണ്ട് ജീവനക്കാരെയും പുത്തൂര്‍ പൊലീസ് കസ്റ്റഡിയിലെടുത്തിട്ടുണ്ട്. രാവിലെ ഒന്‍പതരയോടെയാണ് സംഭവം്. പൂത്തൂര്‍ കല്ലുംമൂട്ടില്‍ നിന്നുമാണ് വിദ്യാര്‍ത്ഥി സ്വകാര്യ ബസില്‍ കയറിയത്. ഡോറിന് സമീപമാണ് വിദ്യാര്‍ത്ഥി നിന്നിരുന്നത്. ബസില്‍ നല്ല തിരക്കുണ്ടായിരുന്നു.
റോഡിലേക്ക് തെറിച്ചു വീണതിനെ തുടര്‍ന്ന് വിദ്യാര്‍ത്ഥിനിയുടെ തലയ്ക്ക് പരിക്കേറ്റിട്ടുണ്ട്. ഡ്രൈവര്‍ക്ക് തുറക്കാന്‍ സാധിക്കുന്ന ഓട്ടോമാറ്റിക്ക് ഡോറാണ് ബസിനുള്ളത്. അപകടത്തിന് കാരണം എന്താണെന്ന് വ്യക്തമായിട്ടില്ല.