മലപ്പുറം: നായ കുറുകെ ചാടിയതിനെ തുടര്‍ന്ന് ഓട്ടോറിക്ഷ നിയന്ത്രണം വിട്ട് മറിഞ്ഞ് ഡ്രൈവര്‍ക്ക് ദാരുണാന്ത്യം. മലപ്പുറം ജില്ലയിലെ എടപ്പാളിലാണ് സംഭവം.
വട്ടംകുളം കാന്തള്ളൂര്‍ സ്വദേശി പ്രജീഷ് ആണ് മരിച്ചത്. നാല്‍പ്പത്തിമൂന്ന് വയസ്സായിരുന്നു. ഓട്ടോയില്‍ യാത്രക്കാരനുമായി പോകുന്നതിനിടെ ഇന്ന് ഉച്ചയോടെയാണ് അപകടമുണ്ടായത്.
നായ കുറുകെ ചാടിയതുകണ്ട് പെട്ടെന്ന് സഡന്‍ ബ്രേക്കിട്ടതോടെ ഓട്ടോറിക്ഷ മറിയുകയായിരുന്നു. അപകടം കണ്ട് നാട്ടുകാര്‍ ഓടിക്കൂടി പ്രജീഷിനെ കോട്ടക്കലിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
അപകടത്തില്‍ ഓട്ടോയിലെ യാത്രക്കാരന് നിസ്സാരമായി പരിക്കേല്‍ക്കുകയും ചെയ്തു. പ്രജീഷിന്റെ മൃതദേഹം ആശുപത്രിയില്‍ സൂക്ഷിച്ചിരിക്കുകയാണ്. പോസ്റ്റുമോര്‍ട്ടത്തിന് ശേഷം കുടുംബത്തിന് വിട്ടുനല്‍കും.