ബെംഗളൂരു: മണ്ണിടിച്ചിലില് കാണാതായ കോഴിക്കോട് സ്വദേശി അര്ജുന് ഉള്പ്പടെ മൂന്ന് പേരെ കണ്ടെത്താന് വേണ്ടി ഗംഗാവലി പുഴയില് പരിശോധന പുരോഗമിക്കുകയാണ്.
ഇതിനിടെ ഷിരൂരിലെ ലോറിയുടെ ഭാഗങ്ങള് കണ്ടെത്തിയെന്ന് മുങ്ങല് വിദഗ്ധന് ഈശ്വര് മാല്പെ. Cp4 മാര്ക്കില് നിന്ന് 30 മീറ്റര് അകലെയായി 15 അടി താഴ്ചയില് നിന്നാണ് ലോറിയുടെ ഭാഗങ്ങള് കണ്ടെത്തിയത്. രണ്ട് ടയറിന്റെ ഭാഗമാണ് കണ്ടെത്തിയിരിക്കുന്നത്. എന്നാല് ഇത് ഏത് ലോറി എന്ന് പറയാന് ആയിട്ടില്ലെന്ന് അര്ജുന്റെ ലോറി ഉടമ മനാഫ് പറഞ്ഞു.
ട്രക്കിന്റെ മുന് ഭാഗത്തുള്ള രണ്ട് ടയറും അതിന് നടുവിലുള്ള കമ്പിയുടെ ഭാഗവും കണ്ടുവെന്ന് മനാഫ് അറിയിച്ചു. ബാക്കി മണ്ണിന് അടിയില് ആകും ഉള്ളത്. ലോറി തല കീഴായി കിടക്കുന്ന നിലയിലാണ് ഉള്ളതെന്നും മാല്പെ പറഞ്ഞതായി മനാഫ് മാധ്യമങ്ങളോട് പ്രതികരിച്ചു.
പുഴയില് ഇറങ്ങി നടത്തിയ പരിശോധനയില് പ്രാദേശിക മുങ്ങല് വിദഗ്ധന് ഈശ്വര് മാല്പെ രാവിലെ അക്കേഷ്യ തടിക്കഷ്ണം മുങ്ങിയെടുത്തിരുന്നു. ഷിരൂര് മണ്ണിടിച്ചിലില് കാണാതായ അര്ജുന് ലോറിയില് കൊണ്ട് വന്ന മരക്കഷ്ണങ്ങളാണ് കണ്ടെത്തിയത്. നേരത്തെ നദിക്കരയില് നിന്നും തടിക്കഷണങ്ങള് ലഭിച്ചിരുന്നു. അര്ജുന് ലോറിയില് കൊണ്ട് വന്ന തടിക്കഷ്ണമാണെന്ന് ലോറി ഉടമ മനാഫും സ്ഥിരീകരിച്ചു.
Discussion about this post