മലപ്പുറം: മലപ്പുറം പത്തപ്പിരിയത്ത് വിവാഹത്തിനിടെ ഓഡിറ്റോറിയത്തിന്റെ ലിഫ്റ്റ് തകര്‍ന്നുവീണ് നാലുപേര്‍ക്ക് പരിക്ക്. ഞായറാഴ്ച ഉച്ചയ്ക്ക് രണ്ട് മണിയോടെ രണ്ടോടെയാണ് സംഭവം. പത്തപ്പിരിയം വി എ കണ്‍വന്‍ഷന്‍ സെന്ററിലാണ് വിവാഹ ചടങ്ങിനിടെ ലിഫ്റ്റ് തകര്‍ന്ന് വീണത്. നെല്ലാണി സ്വദേശി കുഞ്ഞുമൊയിന്റെ മകളുടെ വിവാഹം നടക്കുമ്പോഴാണ് അപകടം സംഭവിച്ചത്.
ഓഡിറ്റോറിയത്തിന്റെ മൂന്നാംനിലയില്‍ പ്രവര്‍ത്തിക്കുന്ന അടുക്കളയില്‍ നിന്ന് ഭക്ഷണവും മറ്റും ലിഫ്റ്റില്‍ താഴേക്ക് ഇറക്കുകയാണ് പതിവ്. വരനും കൂട്ടരും മണ്ഡപത്തിലേക്ക് എത്തിയതോടെ ഇവര്‍ക്കുള്ള ജ്യൂസും വെള്ളവുമായി ലിഫ്റ്റില്‍ കയരിയ നാലുപേരാണ് അപകടത്തില്‍പ്പെട്ടത്.
ലിഫ്റ്റ് കമ്പിപൊട്ടി താഴേക്ക് വീഴുകയായിരുന്നുവെന്നാണ് വിവരം. ലിഫ്റ്റിലുണ്ടായിരുന്ന വലിയപീടിക്കല്‍ മുഹമ്മദ് സഹിം (25), സഫ്വാന്‍ (26), നൗഷാദ് (40), ചുരക്കുന്നന്‍ നഫിഫ് (24) എന്നിവര്‍ക്കാണ് പരിക്കേറ്റത്.
പരിക്കേറ്റവരെ അരീക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു. സംഭവത്തില്‍ പൊലീസ് അന്വേഷണം ആരംഭിച്ചിട്ടുണ്ട്. ലിഫ്റ്റ് പൊട്ടിയത് എന്തുകൊണ്ടാണെന്ന് അന്വേഷിച്ച് വരികയാണെന്നും ഓഡിറ്റോറിയം ഉടമസ്ഥനെ ചോദ്യം ചെയ്യുമെന്നും പൊലീസ് പറഞ്ഞു.