തൃശൂര്‍: ഉണ്ണിക്കണ്ണന്റെ ചിത്രങ്ങള്‍ വരച്ച് ശ്രദ്ധനേടിയ ജസ്‌നയുടെ കൈയ്യില്‍ നിന്നും ചിത്രങ്ങള്‍ വാങ്ങി സഹായവുമായി കേന്ദ്രമന്ത്രി സുരേഷ് ഗോപി. മാതാപിതാക്കള്‍ക്ക് പുതിയ വീട് വയ്ക്കാനുള്ള തന്റെ മോഹം ജസ്ന പറഞ്ഞപ്പോഴാണ് സുരേഷ് ഗോപി ജസ്ന വരച്ച രണ്ട് ചിത്രങ്ങള്‍ താനെടുക്കാമെന്ന് പറഞ്ഞത്.
ശനിയാഴ്ച കൊച്ചി ആര്‍.എസ്.എസ് കാര്യാലയത്തിലെത്തിയ ജസ്ന സുരേഷ് ഗോപിക്ക് രണ്ട് ചിത്രങ്ങളും നല്‍കി. ജസ്ന വരച്ച ചിത്രങ്ങളിലൊന്ന് സുരേഷ് ഗോപി കേന്ദ്രമന്ത്രി അമിത് ഷായ്ക്ക് നല്‍കും.
സുരേഷ് ഗോപിയുടെ മകളുടെ കല്യാണത്തിനായി ഗുരുവായൂര്‍ ക്ഷേത്രത്തിലെത്തിയപ്പോള്‍ പ്രധാനമന്ത്രി നരേന്ദ്ര മോഡിക്കും കൊയിലാണ്ടി കുറുവങ്ങാട് സ്വദേശിയായ ജസ്ന വെണ്ണക്കണ്ണന്റെ ചിത്രങ്ങള്‍ സമ്മാനിച്ചിരുന്നു.
ജസ്ന ഇപ്പോള്‍ കൂടുതല്‍ വരയ്ക്കുന്നത് വെണ്ണക്കണ്ണന്റെ ചിത്രങ്ങളാണ്. ഓര്‍ഡര്‍ പ്രകാരമാണ് വര. 2,500 മുതല്‍ 20,000 രൂപ വരെയാണ് വില. വരച്ച ചിത്രങ്ങള്‍ക്കെല്ലാം ഫ്രെയിമിടുന്നതും ജസ്ന തന്നെ.
തന്റെ ഉപ്പയും ഉമ്മയും ചോര്‍ച്ചയുള്ള വീട്ടിലാണ് താമസിക്കുന്നതെന്നും പുതിയ വീട് നിര്‍മ്മിക്കുന്നത് കണ്ണന്റെ ചിത്രം വിറ്റുകിട്ടുന്ന പണം കൊണ്ടാവണമെന്നാണ് തന്റെ ആഗ്രഹമെന്നും ജസ്ന പറയുന്നു.